PRISM-in Aizawl manifesto tlangzarh

PRISM party chuan August 25, Inrinni khan Aizawl bik tana manifesto an siam chu an president Vanlalruata'n a tlangzarh.

Vanlalruata chuan, Aizawl khawpui an zauh dawn nia sawiin, "In hmun nei lote in hmun pein, in nei lote in kan saksak dawn a ni," a ti.

PRISM President chuan, an sorkar hunah Aizawl khawpui traffic jam tihreh a ni dawn nia sawiin, "Zemabawk leh Kulikawn inkar kawngpui kan zauh dawn a, kawngpui sir leh chungah mamawh phuhru khawp lirthei dahna kan siam dawn a ni," a ti a; Tlawng lui, Sairang leh Reiek káia kum tina tuitla awm reng chu a hmunah tuitla veng leh chhar tur siam a nih tur thu leh Aizawla la awm lo ruang dahṭhatna leh hâlralna lian tham siam tum a nih thu a sawi bawk.

PRISM Aizawl Manifesto-ah hian Aizawl Municipal Corporation hnena thuneihna leh mawhphurhna sang zawk pek a nih tur thu te; real estate leh housing corporation dina felfai taka Aizawl khawpui zauh dan tur te; Aizawl tlak lama by-pass road siam tur te; Aizawl chhim lam aṭanga Sairanga railway station pawh tura kawngpui thar siam dan turte; khawpui chhunga taxi, auto-rickshaw leh two wheeler taxi-ah meter vuah te; Aizawl kawtchhuah Zemabawk, Hlimen, Lawipu, Sairang leh Sihphir lamahte terminal siamte a tel a ni.