Mamit Election Office rawk
Mamit DC Complex-a Election Branch Office chu August 23, 2018 zan khan rawk a ni a, Tripura relief camp-a Electoral Roll Summary Revision tih tawhna lehkha pawimawh hrang hrangte lak chhuah a ni.
Mamit police hotute hnen aṭanga thu dawn danin, Election Office-ah hian August 23 zan khan dar 11 vel thleng thawktute'n hna an thawk a, a tuka thawh chhunzawm turin an hawsan a; lehkha pawimawhte pawh dawhkanah dahin an kalsan a ni. A tûk zing dar 9 vela office-a an kal leh chuan office kalhna talla chhut chhiat a nih avangin office chu rawk a ni tih hriat a ni a; Bru camp-a electoral roll revision form pawimawh zawng zawng lâk chhuah a ni. Tripura relief camp-a electoral roll revision tihna atana hman form-te bak thil bo dang hriat a ni lo.
He thil thleng chungchangah hian August 24 zan dar 8-ah Mamit Police Station-ah FIR thehluh a ni a, thubuai ziahluh a ni. Police-te chuan rinhlelh man an la nei lo a, Mamit Election Branch hotute pawhin rinhlelh an neih loh avangin FIR-ah pawh mimal emaw, pawl hming tarlan an nei lo.
Mamit SP HL Thangzuala hoa Mamita police officer-te ṭhukhawm chuan, Election office rawk chungchang chhui zui turin Special Investigation Team an din a; SIT hi Mamit SDPO-in kaihruaiin, ani bakah hian member pali an awm a ni.