AMC Fact Finding Team report peih tawh ; AMC-in kum 1 hnuah RTI dilna pe chhuak
Kum 2015-a Aizawl Municipal Corporation inthlan hma lawka RTI Act hmanga zawhna chhanna chungchang chhui tura Fact Finding Team chuan report an peihfel tawh. Fact Finding Team report chungchang RTI Act hmanga Vanglaini paliin information a dil chu dilna thehluh aṭanga kum khat leh ni 37 hnuah AMC SPIO-in a pe chhuak.
Kum 2015 tawp lama AMC inthlan hma lawkin kum 2012-2015 chhung AMC hnathawh dan RTI Act hmanga dil chhuahah, hna thawh anga inziak si, a taka thawh hmuh tur awm lo anga tarlan a ni a; hei vang hian AMC-a rorel lai Congress party leh eptu MNF party-te inkarah thu inchuh a awm a ni. AMC commissioner Dr H Lalthlangliana chuan, RTI Act hmanga document pek chhuah chu chhui chiang turin December 7, 2015-ah Fact Finding Team a din a ni.
AMC Fact Finding Team report hi Vanglaini palai chuan June 16, 2017 khan RTI Act hmangin a dil a, mahse, AMC-a SPIO chuan RTI Act diltu hnenah hian dilna thehluh aṭanga kum khat leh ni 37 hnu, July 23, 2018 khan chhanna a pe chhuak chauh a ni.
RTI Act hmanga information dilnaah hian, 'Kum 2012-2015 chhunga AMC-in hna a thawh dan chungchang, RTI hmanga zawhna chhuah hnua AMC Commissioner-in chhui chiang tura Fact Finding Team a din khan report a peihfel tawh em? A peih fel tawh a nih chuan Fact Finding Team report hi a kimchanga min pe turin ka ngen a che,' tih leh, 'Fact Finding Team report hi peih a la nih loh chuan eng nge a chhan dik tak min hrilhfiah turin ka ngen bawk a che,' tia zawh a ni.
RTI dânin a sawi ang chuan, chhanna hi ni 30 chhungin a zawttu hnenah pek tur a ni a; AMC SPIO leh SAPIO-te chuan information diltu hnenah hian September 1, 2017 khan hriatthiam dilna lehkha an pe a; Fact Finding Team report chu peih ṭêp a nih thu leh peih a nih veleh pek a nih tur thu an hrilh.
May 2018-ah pawh information an pe pek chhuah loh avangin information diltu chuan RTI Act 2005, Chapter 1, Section 1 angin AMC-a Departmental Appelate Authority (DAA) Dr H Lalthlangliana, commissioner hnenah zualkona a thlen a ni. AMC-a DAA chuan an SPIO hnenah May 30, 2018-ah ziakin hma a la zui a; lehkha pek a nih aṭanga ni sarih chhungin DAA-ah RTI Act chhanna copy pe tur leh hmalakna turte a hriattir a ni.
AMC SPIO chuan July 23, 2018 khan Fact Finding Team report chu RTI hmanga information diltu hnenah a pe chhuak ta a; Report chu a diltu hnenah a vaiin a pe a, AMC term hmasa hun laia hna inpek dan, AMC ward no. 1-19 thlenga an zir chianna zawng zawng thil tel a ni.
Fact Finding Team report-ah hian, kum 2012-2015 chhunga AMC aṭanga tender chhuah loa work order pek chhuah zawng zawng thil tel a nih thu te, chumi chhung chuan AMC-in hna 1,000 chuang a thawh thu te, hna pek leh a tak awm si lo nia sawite chu Fact Finding Team-in a hmunah an endik zel thu leh a ṭhen chu a dik thu leh dik tawk lo a awm thu te, hna ṭhenkhat chu leimin vangin a hmunah enfiah tur a awm tawh loh thute an ziak.
AMC Fact Finding Team-ah hian AMC secretary Ethel Rothangpuii chu chairperson a ni a, AMC superintendent H Lalruatliana leh system administrator K Vanlalruata te chu member an ni.