Kawlphetha man pek tlai vangin sorkarin Kum 5 chhungin cheng vbc. 40 chawi belh
Mizoram sorkarin a hun taka kawlphetha hman man a pek theih loh avangin kum nga chhungin kawlphetha man pangngai bakah, Rs. 40,01,10,401 a chawi belh. May 2018 thlenga Mizoram sorkarin kawlphetha hman man a bat zat chu Rs. 50,59,86,017 a ni.
RTI Act hmanga zawhna, Power & Electricity department-in an chhan danin, kawlphetha hman man hi budget estimate aṭangin expenditure sanction dil ṭhin a ni a, sanction hmuh hunah pek ṭhin a ni. Sanction dil leh pek chhuah vel buaipui chhung a rei avangin kawlphetha hman man a hun taka pek theih a ni lo tlangpui a, chu vang chuan sorkarin thla tin sum tam tham tak a chawibelh ṭhin.
A hun taka kawlphetha hman man pek loh vanga kum nga chhunga Mizoram sorkarin sum a chawi belh dan chu - kum 2013-14 chungin Rs. 8,69,46,475, kum 2014-15 chhungin Rs. 12,19,56,329, kum 2015-16 chhungin Rs. 3,87,25,319, kum 2016-17 chhungin Rs. 11,19,74,467 leh kum 2017-18 chhungin Rs. 4,05,07,811 a ni.
P&E department hian tun dinhmunah company panga - North Eastern Electric Power Corporation Ltd. (NEEPCO), Natural Thermal Power Corporation (NTPC) Ltd., Natural Hydro Power Corpoartion (NHPC) Ltd., Tripura Power Generation Limited (TPGL) leh ONGC-Tripura Power Company Limited (OTPCL) aṭangtein kawlphetha a lei ṭhin a ni.