MLA-in helipad pahnih a hawng

Chalfilh bialtu MLA Dr Ngurdingliana chuan a bial chhunga khaw pahnih - Phullen leh Khawlian khuaahte helicopter ṭum­hmun (helipad) siam tharte chu August 25, Inrinni khan a hawng. Helipad-te hi Rs. 11,00,000 ve ve senga siam a ni.

Dr Ngurdingliana chuan, Phullen leh Khaw­lian ten helipad an neih theih chhan chu GAD Aviation Wing hotu­te duh­sakna te, Mizo­ram sorkar thilphalna leh khawtlang mipuite inpek­nate a nih thu a sawi a, "Khaw nei­tute mai ni lo, khawṭhen­awmte pawhin ṭul leh pawi­mawhah an hman ṭang­kai ngei ka beisei a, uluk tak leh fai taka enkawl zui hi khawtlang mipui mawhphurhna a ni," a ti.

Inrinni vek khan Dr Ngurdinga hian Dilkhan com­munity hall, cheng nuai 16 senga sak leh Daido khuaa Saihlupuii Sailo Me­morial Hall, cheng nuai 20 senga sakte a hawng bawk.