Plastic hmanga kawng siam dan tur sawiho

Tun hnai khan Chite Lui humhalh tura din Save Chite Lui Executive Committee chu principal secretary Lalnun­mawia Chuaungo hoin CS conference hall-ah an ṭhukhawm a, kawng siamna atana plastic hman dan tur an sawiho.

Lalnunmawia Chuau­ngo chuan Chite Lui chhan­chhuahna tur atan hian hmalakna hrang hrang, awmze nei tak tak kalpui mek a nih thu sawiin, "Tun hma aiin mipuite bawlhhlawh paih chungchangah kan fing chho zel a, kan ram lui leh tuihnate pawimawhna kan hrechiang telh telh a ni," a ti.

Save Chite Lui Executive Committee ṭhukhawm tawhin, meeting-ah hian ‘Save Chite Lui’ project kalpuina atana hma­lakna hrang hrang thlirletna hun hman a ni.

Meeting-a tarlan a nih danin, Chite Luia bawlhhlawh paih 85%-90% hi plastic a ni. Kawng siamna atan plastic hi Karnataka, Meghalaya-ah te hlawtling takin hman a lo ni tawh a ni.

Plastic khawn khawm dan tur te, kawng siamna nena pawlh dan turte leh khawl mamawhte meeting-ah sawiho a ni.

June, 2017 aṭang khan Save Chite Lui Comprehensive Action Plan Phase-I kalpui niin mipui hnena lui leh tuihna humhalh chungchanga inhrilhhriatna seminar, hna­tlang, nature trekking, docu­mentary hmang ten neih a lo ni tawh a ni.

Aizawl DC pawhin Chite Luia leivung paih khapna tichhuak tawhin The Chite Lui (Prevention and Control of Water Pollution) Act, 2018 pawm a ni tawh bawk.