Pu Hawla zu lipui kan sah darh ang - Dr R Lalthangliana

MNF vice president Dr R Lalthangliana chuan, "MNF kan sorkar veleh Pu Hawla zu lipui kan sah darh ang," a ti a; H Rohluna chu School Education Minister ni tlaka a ngaih loh thu a sawi bawk.

August 24, 2018-1 Khaw­bunga MNF East Tuipui South Block buatsaih 'SEDP zirhona leh political training' ah thu sawiin R Lalthangliana chuan, "Mi tam tak nunna suattu, chhungkaw tam tak tibuaitu, hmeithai leh fahrah siamtu khawl, HIV nasa taka tipunluntu, KS leh zu zuartute chauhin a hlâwkna an tèl leh kan Mizo Kristian nun nasa taka tichhetu Pu Hawla zu lipui hi MNF sorkar hunah kan sah darh vek dawn a ni," a ti.

Dr R Lalthangliana chuan, School Education Minister-in zirtirtu indaih lohna sem rual chungchangah, 'Inthlan a hnai tawh a, ka khawih ngam lo' tia a sawi chungchangah, "Education Minister ni tlakah ka ngai lo. Kum 9 leh thla 8 chhung khan chinfel vekna hun tam lutuk a nei a, engmah a ti lo a nih kha," a ti a; MNF sorkar laia Hindi teacher 1,187 te, RMSA leh SSA hnuai bakah zirtirtu leh thawktu tam tak an la a, hlawh lak theih loh leh bân an nei ve ngai lo tih sawiin, Congress sorkar erawh chuan Hindi teacher 1,305-te a bàn vek tih a sawi.

School Education minister hlui R Lalthangliana chuan, "MNF kan sorkar ang a, zirtirtu indaih lo te, school building rawih tawh lutukte hi thuam ṭhain kan chingfel nghal ang," a ti.