Serena thawmhnaw hak chhunzawm phal lo

French Open khelh zawh takah Serena Wil­liams chu a dum vekin a inthuam a, French Ten­nis Federation chuan he thawmhnaw hi season thar­ah chuan hak a remchan tawh dawn loh thu an sawi.

Grand Slam vawi 23 champion tawh Serena hian fa a neih hnuah season a hmang thar ve leh a, Paris-ah khan seeded pek ni se chuan main draw aṭangin a khel thei dawn. Mahse, clay court inelna lianah hian duhsakna pek a ni lo a, a ranking a hniam miau avangin qualifier aṭangin a khelh a ngai.

American star hian inelna hmachhawn mah se kum danga a tih loh danin thawmhnaw dum hlang a inbel a, a kawr hak chhan hi French Open dona ni lo angin sawi ṭhin mah se inelna buatsaihtu lam chuan an ngaithei lo.

French Tennis Federa­tion president Bernard Giudicelli chuan, "Phal a ni tawh lo ang, kawng ṭhenkhatah chuan kan kal thui deuh a ni. Tennis game hi zah tur a ni a, chu bakah infiamna hmun kan zah tur a ni bawk," tiin a sawi.

Kum 36 mi Serena hi an rama inelna lian ber US Open-ah a inlan dawn a, Thawhlehni zing dar 4:30 hian Magda Linette nen first round an khel ang, hard court inelna lianah hian seeded 17-na pek a ni.