Bru chhungkaw thum hruaikir
Tripura refugee camp-a Bru-te hruaikir hna August 25, 2018 aṭanga thawh ṭan chu nimin khan tihtawp a ni a, chhungkaw pathum Mizoramah hruaikir an ni.
Hruaikir hna thawh a nih hma hian Mizoram sorkar official-te chu refugee camp-ah hian kalin, Bru-te chu Mizorama kir an duh leh duh loh an zawt a, chhungkaw 423 chuan kir an duh a ni. Mah se, hruaikir hna thawh a nih hnu hian chhungkaw pathum chiahin kir an duh.
Chhungkaw pakhat Lunglei district-a Putlungasih khuaa awm tur chu August 25 khan Mizoram panpui niin, Pathianni zing khan Lunglei thlenpui an ni. Kolasib district-a awm tur chhungkaw pahnih chu nimin khan Mizoram panpui an ni a, nimin khan Kolasib thlenpui an ni. Meidum leh Zodin khuaah dah an ni ang.
Kir duh chhungkaw dang an awm tawh loh avangin hruaikir hna thawk tura refugee camp-a kal Mizoram sorkar official-te chuan nimin khan Mizoram an rawn pan vek a ni.