Huapzo sorkar kan din dawn - MNF Sr. Vice President

MNF senior vice president Tawnluia chuan nimin khan Khaw­zawl Zaingen Venga MNF Tuichang North Block 'Workers Meet cum Mi thar lawmluhna' inkhawm a hmanpuinaah thu sawiin, mi zawng zawng tel theihna leh mi lenna huapzo sorkar an din dawn niin a sawi.

Tawnluia chuan, Mizo na­tionalism humhim bakah sakhua humhim a ṭul thu sawiin, "Keini MNF chuan 'Pathian leh kan ram tan' tiin Pathian hming lam hmasain ke kan pên a ni. MNF hi kan sorkar a nih chuan mi zawng zawng tel theihna leh lenna huapzo sorkar kan din dawn a; mipui belhtlak sorkar a ding ang a, lal chhungkaw sorkar kan din ve dawn lo," a ti.

MNF huapzo sorkarah chuan sum leh pai duhamna vanga zahawmna hralh ṭhinna tihreh an tum dawn tih sawiin Tawnluia chuan, "Corruption tihreha umbo kan tum dawn a ni. Decentralisation of power a takin kan kengkawh ang a, langtlang sorkar kan siam ang a, local self government awmze neiin kan siam ang," a ti a; district level-ah Development Committee din an tum thu a sawi.

SEDP hmangin mi zawng zawng dinchhuahna tur programme an nei nia sawiin Tawnluia chuan, "A takin SEDP kan kalpui dawn a, hnam martar leh an chhungte leh returnee-te khaichhuahna tur pawh SEDP-ah kan dah a, ngaih pawimawh bik an ni ang," a ti.

MNF Sr.Vice President chuan, MNF sorkar hunah zu khap a nih dawn thu te, Hindutva leh bawng talh khap pawh an pawm loh thu te, sorkar anga Yoga practice an tum loh thu te, Kristianna kalh thil reng reng an tih ve dawn loh thu te, sikul kal hun tihdanglam chu ennawn an tum thute a sawi bawk.

Tawnluia chuan, kum 10 MNF sorkar tawh chhungin tih dik loh tam tak an nei tih an inhriat thu sawiin, "Mizo mipui zawng zawng chunga kan lo tih dik lohahte leh Khawzawl Block leh Unit-te hnenah ngaihdam ka dil tak meuh meuh che u a ni," a ti.