CM Hawla'n Mizoram Bru-te Theihtawp chhuahpui a tiam

Tripura aṭanga Mizo­rama Bru kîr tawhte'n relief camp-a Bru awm mekte Mizorama hruai kir an niha an dawn tur ang dawn ve theihna atana hma la tura pawl an din, Equal Pacakage Demand Committee (EPDC) hruaitute chuan tun hnai khan chief minister Lal Thanhawla a pisaah an hmu a; Chief Minister hian theihtawp chhuahpui a lo tiam niin an sawi.

EPDC hruaitute hnen aṭanga thu dawn danin, Chief Minister hian EPDC hruaitute chu Mizo­rama kir tawh Bru-te'n la hruai kîr turte dawn ang dawn ve chuan an phut chungchangah, "In chung chang hi Union Home Minister pawh ka lo sawi­pui tawh a. Lo kir hmasate hi sorkar rua­hman­na ang zâwma lo kal in nih avangin tuna la chámbángte aia tam dawn hi in phu a ni. Theihtawp ka lo chhuahpui zel ang che u," a ti.

Chief Minister hnenah hian EPDC chuan lehkha an thehlut a; an lehkhaah chuan, Mizorama kîr tawhte'n hruai kîr tum mekte aia chhawmdawlna an dawng tlem bik tur chu ṭha an tih loh thu tarlangin, "Kan dikna chanvo kan hmuh ve ngei theihna atan ṭhahnemngai takin hma kan la a, lehkha pawh Prime Minister, Union Home Minister, Union Home Secretary etc. hnenah kan thawn nual tawh," an ti. Tun thlenga sorkar laipui aṭanga chhanna mumal an la hmuh loh avangin an ngaih a ṭhat loh thu an tarlang bawk.