MZP-in foreigner 424 an man chhuak tawh

Mizo Zirlai Pawl (MZP)-in August 16, 2018 aṭanga Mizoram chhunga hnam dang dan loa khawsa, Inner Line Permit (ILP) nei lo leh Assam National Register of Citizens (NRC) list-a chuang lote dap chhuah hnatlang an neih mekah nimin chawhnu thleng khan Assam NRC-a chuang lo, foreigner 424 an man chhuak tawh tih an tarlang.

MZP hian August 16 aṭanga hnam dang an enfiah bakah hian, Assam nena inrìna bul khua - Vairengte, Bairabi leh Saiphaiahte August 20 aṭangin an duty a, Assam aṭanga Mizorama luh tum hnam dangte chu an enfiah zel a ni. Assam NRC-a chuang lo foreigner Mizorama luh tum mi 424 an man chhuah tawhte chu Mi­zoram police nen ṭang­rualin Assam lamah thawn lêt nghal zel a nih thu an sawi.

MZP chuan, khaw pathuma check point an siamahte chuan duty chhunzawm zel an tum thu an sawi a, "Assam NRC-a chuang lote chu foreigner an nih avangin, hmun hrang hrangah an tlanchhe mek a, Assam aṭanga Mizoram luh tum hnam dang zingah NRC-a hming lang lo foreigner an awm ngei tih finfiah a ni tawh a, Mizoramah hian foreigner ṭhahnem tak an lo luh ngei pawh kan ring a ni," an ti.

MZP chuan, Mizo ram leh hnam chu ven a ngai a, humhalh a nih theih nan theihtawp chhuah a ngai tih hriaa insangmar turin Mizo mipui an ngen a; a ṭul ang zela pên chhuak turin an ngen bawk a ni.