KHAWTHLIR

Thing phun
Champhai Forest Division chuan Mother Teresa pian champha vawi 108-na pualin nimin khan Champhai Bethel Vengah thingphun hnatlang an huaihawt a, MLA TT Zothansanga'n a hmanpui. MLA chuan, Mother Teresa chu hmangaihnaa khat, thliar bik awm loa a mihringpuite rawngbawlsaktu leh a nun puma mite ṭanpui ṭhintu a nih thu a sawi. Mother Teresa hi August 26, 1910-ah a piang a ni a, kuminah August 26 hi Pathianni a nih avangin nimin khan thing hi phun a ni.

Dan zirho
Lawngtlai RD Block chhunga sorkar hnathawk, V/C president-te leh tlawmngai pawl hruaitute tan nimin khan Lawngtlaia BNRGSK Hall-ah 'Mizoram Right to Public Services Act, 2015' chungchang zirhona buatsaih a ni.

Thlân tifai
Thenzawl Vengthar Branch YMA chuan nimin khan hnatlang koin, Mizo lal, Bengkhuaia thlân leh a bul velte an sâm fai a, YMA member 40 chuang an thawk chhuak. Bengkhuaia hian kum 1871-ah Cachar thingpui huan an rûnnaah James Winchester thatin, a fanu Mary Winchester (Zoluti) an man a, Zoluti hi kum 1872-ah British Gen. Brownlow-a leh a hote'n an la let leh a ni.

Sanitation campaign
Cherhlun Village Health Sanitation and Nutrition Committee (VHSNC) chuan nimin khan an khuaa zirlaite leh zirtirtute nen hriselna leh faina kawngah inzirtirna hun an buatsaih. Health & Sanitation Campaign hi hmun pathum - Cherhlun Gospel Centenary School, Cherhlun High School-ah leh Cherhlun Higher Secondary School-ahte neih a ni.

Mi 20 thu zawt tawh
August 23, 2018 zana Mamit DC Complex-a Election Branch Office rawk chungchangah Special Investigation Team chuan mi 20 vel thu an zawtfiah tawh a, man erawh an la nei lo. Mamit police hotute hnen aṭanga thu dawn danin, Election pisa rawk chungchang hi SIT-in ngawrh takin an chhui mek zel a, Mamit SP HL Thangzuala chuan a hnenah report nitin thehlut turin a hriattir a ni.