Kut hnathawktute 7th. Pay kan pe ang - Lalduhoma

Zoram Peoples' Movement (ZPM) chief ministerial candidate Lalduhoma chuan nimina ZPM pisaa inkhawmah thu sawiin, Mizoram sorkarin a hnuaia thawkte 7th. Pay a pe dawn tih a sawi a, "Keini ZPM chuan kut hnathawktute hnenah 7th. Pay kan pe ve thung ang," a ti.

ZPM PAC member Dr Lalbiakdiki Hnamte kaihruai inkhawmah hian Lalduhoma chuan, "Congress sorkar hmasain Silchar vai pakhat Sundar Ali a duhsak avangin kut hnathawktute thlai thar control in, rate hniam takin a siamsak a, sawhthing a lei a, a tiṭawih a, a ngaihna an hre lo," a ti a; state páwna thlai tharte zalen taka Mizoramah an châwkluh laia ram neitute thlai tharte state páwna hralhna tur sorkarin a thunun leh si chu lungchhiatthlak a tih thu a sawi.

Lalduhoma chuan, MNF sorkar laiin Mizorama kut hnathawktute thar chhuah zinga chi (item) 138 chu sorkarin a thunun leh tih sawiin, "Pudina leh bahkhâwr thlengin Trade & Commerce department aṭanga permit an neih loh chuan ram páwna hralh khapsak a ni a, kum 1998-ah Hmeithai Association-in Kolkata-ah man man zawka hralhna an hmu a, an buaipui a, a hun laia sorkarin a puih duh loh avangin an beidawng a ni," a ti.

ZPM Chief Ministerial Candidate chuan, "Mizorama kan sorkar hrawn tawhte hi chu thlám bang chhak namthlaka bang thlang pin nana hman ang chauh an ni," tiin a sawi bawk.