Faina kawnga hmalak dan zirna buatsaih

Aizawl District Sanitation Implementation Committee chuan nimin khan Information & Public Relations directorate auditorium-ah Sanitation Campaign 2018 atana hmalak dan turte leh a kalpui dan tur zirna an buatsaih a, Aizawl bawrhsap Dr A Mutham­ma-i'n a hmanpui.

Dr A Muthamma chuan, Mizo­te chu faina ngaina tak hnam an nih thu sawiin, "Kan khawpuite hi fai taka kan enkawl zel theih nan bawlhhlawh sâwngbâwl dan mumal tak kan neih a ngai. Sanitation Campaign-ah hian kan veng chhung ṭheuh kan tihfai bakah, kan veng chhungah faina kawnga hma kan sawn ṭheuh theihna turin ṭan ila ang u," a ti a; Aizawl luhká ber, Lengpui aṭanga Hunthar Veng inkar chu zin mite hmuh hmasak a nih avangin faina kawngah ngaih pawimawh hmasak ṭul a tih thu a sawi.

Aizawl additional DC John LT Sanga pawhin thu sawiin, "Mizoram hi kan ram neih chhun a ni a, mawi tak leh fai taka enkawl tura kan mawhphurna hlen chhuak tura ṭan kan lak angai a, he Sanitation Campaign 2018 hi i hmang ṭangkai ang u," a ti.

NEDP hnuaiah UDPA department kaltlangin Aizawl DC-in Sanitation Campaign 2018 buatsaih a tum a, campaign chhung hian tuihna, luikawr leh lui kam tihfai uar zawk a kalpui tum a ni.

Aizawl khawpuia local council hruaitute nen thawkhoin, Tlawng leh Chite lui fintu luikawr tam zawk luanna vengahte nasa zawk­a campaign kalpui tum a ni a; Aizawla LC 26-te bakah, Lengpui, Darlawn, Saitual leh Sairangahte faina kawng­a hmalakna kalpui tura rua­hmanna siam a ni.