Ruahtui a tam em em laia Kan khamkhawp lo hi a pawi - RD Minister

Mizoram Watershed Development Agency (MWDA) leh People's Science Institute (PSI), Dehradun chuan nimin khan Aijal Club-ah ‘Participatory Ground Water Management & Springshed Development Training’ an buatsaih. Training hawngtu, Rural Development minister R Lalzirliana chuan, Mizoramah ruahtui a tam em em laia mipuiin tui an khamkhawp ṭhin lo chu pawi a tih thu a sawi.

R Lalzirliana chuan, tui humhalh dan tur kawng hrang hrang zirnaa telte chu ṭha-hnemngai taka thu sawite ngaithla turin a fuih a, "In thil zir chhuahte thing-tlang lama hnathawkte hrilh leh chhawng theitu nih ngei tum ang che u. Kan ramah hian ruahtui a tam em em a, chutiang karah chuan kan khamkhawp tui kan hmu lo ṭhin hi a pawi hle a ni," a ti.

RD Minister chuan, tuihna humhalhna leh tui luang ral tur ṭangkai taka hma a nih theihna atana training buatsaih a ni chu lawmawm a tih thu sawiin, "Sorkar chuan leilung leh tui humhalh­na kawngah project hrang hrang hmangin hmalakna tam tak a nei tawh a ni," a ti a; RD department chuan Pradhan Mantri Krishi Sinchayee Yojana- Watershed Development Component (PMKSY-WDC) kum 2009 aṭanga a kalpui thu a sawi.

RD secretary Lal­hmingthanga pawhin thu sawiin, kum thum kal taah Nagaland sorkar leh People's Science Institute (PSI) ṭangkawp buatsaih Consultative meeting and training on Participatory Ground Water Management, Nagaland-a neihah a tel ve thu a sawi a, "Kha training khan Mizorama kan buaina lian tak, tui ­luang ral turte ven kawng­ah min pui nasa a ni," a ti.

People's Science Institute (PSI), Dehradun hi NGO niin, kum 1988-a din a ni a, Himalayan state leh hmarchhak bial­ah sorkar nen ṭangkawpin Natural Resource Management an kalpui a ni.