Kolasib-ah Cancer Support Group din

Mizorama a vawi khatna a tan, cancer veite khawtlang huapa chhawm­dawlna leh enkawlna mumal zawk a awm theihna atan tun hnai khan Kolasib-ah 'Kolasib District Cancer Support Group' (KDCSG) din a ni a, an thupui chu 'Beiseina êng' tih a ni.

KDCSG dinna inkhawm hi Kolasib DC Dr Arun T-a'n a kaihruai a; Cachar Cancer Hospital aṭanga tel Dr Ravai Kannan chuan, "Cancer natna hi India ram pumah, a bikin Mizoramah a hluar hle a, chhungkaw tam tak a tibuai mek. Cancer natna tuar mekte'n inekawlna chungchangah pawh kawng hrang hrangin harsatna tam tak an tâwk a, Cancer Support Group member-te hian inenkawl mekte hi nasa takin an ṭanpui thei dawn a ni," a ti.

Maxx Foundation India aṭanga tel Dr Viji Venkatesh chuan, Cancer Support Group din a ṭulna chhan leh a pawimawhna leh cancer natna tuarte'n hrehawm tak leh rilru hah taka hun an hman loh theih dan a lem nen a sawifiah bawk.

KDCSG-ah hian Core Committee siam niin patron atan district bawrhsap Dr Arun T a ni a, convener atan Kolasib sub-headquarters MHIP president Vanlalchhuangi ruat a ni. Member-te chu - Kolasib sub-headquarters YMA president C Liankunga, MUP president C Lianzuala, Kolasib District Hospital-a medical superintendent Dr James RE Mawia leh Mizoram Cancer Care Foundation (Kolasib) aṭangin Sangchungnunga te an ni.