Sipai bàngte'n kawng an zawh

Sipai bang intel khawm, Mizoram Ex-Service League (MESL) chuan sorkara an thil phût tihhlawhtlin nawrin nimin khan Aizawl leh district khawpui hrang hrangah kawngzawh an huaihawt a; sipai bángte leh an chhungte mi ṭhahnem tak an tel.

Kawngzawh hi Aizawkah chuan chawhma dar 11-ah Chanmari kâwnah ṭan a ni a; a ṭanna hmunah hian MESL Committee member Hon.Capt. VR Mawia'n thu a sawi.

Zarkawt kâwnah MESL vice president Hon.Capt. Ngura Sailo-in thu a sawi a; a tawpna, Vanapa Hall kawtah MESL president Col. John Zama'n thu a sawi thung.

MESL president Col. John Zama chuan, an thil phût hrang hrangah Chief Minister an hmuh fo tawh thu leh MLA zawng zawng hnenah memorandum an pek tawh thu a sawi a, "A ṭul chuan kawng kan la zawh leh ang a, chaw nghei a ṭul leh kan nghei mai ang. Agitation hi kan ti zel dawn a ni," a ti.

Col. John Zama chuan, Cabinet-in hmanhmawhthlak bik (emergency) thilah chauh ordinance a siam ṭhin tih sawiin, "August 13, 2018-a Cabinet meeting-ah MRHG-a Director General post, MPS tan liau liaua siamna tur dan an pawm a, emergency a awm si lo a, MPS lamin emergency ah an ngai a ni ang; Home Minister-in a pu lut a, Cabinet-in a pawm a ni," a ti a; sorkar thil tih dan chu ex-servicemen-te an hmuhsitzia tilangtu a nih thu a sawi.

MESL President chuan, Mizoram Home Guard chu ex-servicemen hna thawh chhuah, an kutchhuak liau liau a nih thu a sawi a, "MRHG enkawl turin tuna Commandant General aia ṭha hi tuna kan MPS zingah an awm lo, ani aia expirience nei ṭha an awm lo," a ti.

MESL hian an thil phûtte tihhlawhtling tura sorkar kar nan June 14, 2018 khan Aizawl khawpuiah Zarkawt kâwn aṭanga Vanapa Hall kawt thleng kawng an lo zawh tawh bawk.

MESL lungawi lohna leh phûtte
1. India rama sorkar hna reng rengah, kum 60 thleng service theih a ni a, kum 60-ah full pension-in sorkarin a chawlhtir ṭhin. Sipaiah chuan a tlangpuiin kum 35-45 inkar an nih laiin an duh emaw duh lo emaw, Service Rules angin pension hlawh tlem pein chawlhtir an ni ṭhin. Chuvagn chuan sorkar laipuiin kum 1979-ah thuchhuah a siam a, sipai bángte tan sorkar hna group C-ah 10% leh group D-ah 20% hauhsak turin a ti a; hei hi Mizoram sorkarin a hmang ve lo a, hmang turin sorkar an phût.
2. Ex-servicemen-te chu service rei lo te hnuah châwlin, service laia hamṭhatna tam tak an dawn ṭhinte vawi leh khatah a tawp ṭhin. Chuvang chuan sorkar laipuiin state sorkarte hnenah ex-servicemen tan Property Tax àwlna (exemption) siamsak turin a ti a; mahse, Mizoram sorkar chuan ex-servicemen-te Property Tax a àwl lo a, àwltir turin sorkar an phût.
3. World War-II veteran leh an thihsan an nupui (hmeithai)-te lawmman chu sorkar laipuiin a tlem berah Rs. 6,000 ni se, a ti. Hemi chungchangah hian Governor leh Chief Minister-te MESL hruaitute'n ṭawngkaa an biaknaah Rs. 6,000 tling si loa tipung tur anga an sawi hnuah hmalakna a awm lo. 2nd. Assam Regiment disband-te pawh sorkarin kum 2017-ah an lawmman tihpun tiam mah se, tun thlengin tihpun a la ni lo. Hengte hi tipung turin sorkar an phût a ni.
4. March 20, 2018 Assembly session-ah Home Minister-in Mizoram Home Guard (MRHG)-a Director General post chu MPS-te'n Secretary level post an neih ve theihna tura siam a nih dawn thu a puang. Central leh state guideline te, MRHG leh Mizo ex-servicemen-te inkungkaihna ngaihsak hauh loa Mizoram sorkarin MPS tana Director General post siamna ordinance Cabinet-in a pawm tawh chu sût an phût.