Naupang pawikhawihna tuartute ṭanpui dan inzirtirna hun buatsaih

National Commission for Protection of Child Rights, Mizoram State Commission for Protec­tion of Child Rights, Mi­zo­ram State Child Pro­tection Society leh Social Welfare department chuan, nimin khan pawngsual leh mipat hmeichhiatna kaihhnawiha pawi­khawihna tuartu nau­pangte ṭanpui dan tur, Multidimensional Psychological Trauma Assessment and Inter­vention for Child Sexual Abuse inzirtirna an buat­saih a, DGP Balaji Sri­vastava-a'n a hmanpui.

Balaji Srivastava chuan, Protection of Children from Sexual Offences Act (POCSO) Act, 2012 hnuaiah Mi­zoramah kum 2014 aṭanga kumin June thla thleng khan thubuai 719 ziah luh a nih tawh thu a sawi a, "Pawi khawitute dan ang taka hremna (conviction rate) a sang hle. Mizoram hi India ram pumah POCSO Act hnuaia conviction rate nei sang ber a ni," a ti.

Mizoram DGP chuan, naupang laka pawi khawihtute'n thiam loh an chan a, dan anga hrem an nih ngei theih nan police-te'n ṭan an lak thu sawiin, "Hetiang thil rapthlak tak a thlen hian police-te chuan uluk taka chhui leh pawi khawihtute thiam loh chantir (convict) an nih thuai theihna tura hmalak chu an mawhphurhna a ni," a ti a; police-te chuan theihtawp chhuah zel an tum thu a sawi.

Training hi MSCPCR chairperson Sangzuali Vanchhawng-in a kai­hruai a; AIIMS, New Del­hi aṭanga tel Dr Ra­jesh Sagar leh Dr Renu Sharma ten thupui thlan bikte an sawi a ni.