MNF hunah Referral Hospital leh MIMERS atan Sum sanction a awm lo - Congress Ṭhalai

Mizoram Pradesh Youth Congress Committee (MPYCC) chuan, MNF sorkar laiin State Refferal Hospital, Falkawn leh MIMERS atan sum sanction cheng khat pawh a awm loh thu an sawi a, "MNF-te hian MIMERS chungchang hi sawi ve tawh suh se," an ti.

MPYCC hruaitute chuan nimin khan Aizawl Press Club-ah thuthar thehdarhtute an kâwm a; MPYCC president Dr Lalmalsawma chuan, kum 1996-a prime minister HD Deve Gowda-a'n Mizoram a tlawh ṭumin, chief minister Lal Thanhawla kaihhruai sorkarin damdawi-in lian leh medical college Mizoramin a mamawh thu a lo thlen tih sawiin, "PM-in ngai pawimawhin Referral Hospital sakna atan Planning Commission-in Mizoram sorkar cheng vbc. 40.53 a rawn pe a ni," a ti a, kum 1998-a MNF an sorkar hnuah cheng vbc. 40.53 chu an suasam niin a sawi.

Dr Lalmalsawma chuan, Referral Hospital sakna tur chu MNF sorkarin an party mite induhsakna atan leh sum siamna atan an hmang nia sawiin, "Congress sorkar sum dil chhuah sa chu ruahmanna mumal awm loin MNF sorkar khan sum siam ringawt ûma tlânte leh mahni chenna tur concrete building em pawh la sa lo, experience nei miah lo party worker-te khan contractor-te hming hawh chawpin an sa ta sup sup a ni," a ti.

MPYCC President chuan, damdawi-in lian din tur ni si, damdawi-in tur tak an din ṭhat hmain thawktute chenna tur building za tél sak a nih thu sawiin, "Hospital main building phei chu ruhro ding ang maia phuailuaiin an hnutchhiah a ni. Building hrang hrangte hi a sak dan phung leh sum hmanna a inmil loh avangin August 18, 2005 khan DoNER deputy secretary DK Singh chuan a hmunah a rawn endik a ni," a ti a; hnathawh a ṭhat loh avangin khum 300 awm thei tura ruahman chu khum 50-ah tihtlakhniam a nih thu a sawi.

MNF sorkar laia Health minister R Tlanghmingthanga'n Referral Hospital din chungchanga a ngaihna an hriat loh thu leh sorkar laipui aṭanga sanction a tàwp vanga harsatna an tawh thu a sawi nia tarlangin Dr Lalmalsawma chuan, "MNF Health Minister thusawi hi Zoram mipuiin an la theihnghilh lo. Hetiang a nih lai hian kum 2008-ah Pu Lal Thanhawla kaihhruai Congress sorkar a din khan CM leh Health minister Lalrinliana Sailo hmalakna zarah Referral Hospital hi tuaihnûm leh a ni," a ti.

Dr Lalmalsawma chuan, tuna Health minister Lal Thanzara inpekna leh ṭhahnemngaih avang liau liauin Referral Hospital chu medical college-ah hlàn kai a nih thu sawiin, "Pu R Tlanghmingthanga hian mipuiin an theihnghilh ta emaw tia MNF kutchhuak ang leh Congress-te'n a chhawm zuia medical college din ta anga a puh hian ama mawng a hlîm thar leh mai zawk a ni," a ti a; Referral Hospital leh MIMERS chu party anga tlawh tur chuan MNF hotute'n mi hmingṭha deuh thlang tawh se an duh thu a sawi.

MPYCC hruaitute tarlan danin, MNF sorkar hun lai, kum 1998-2008 chhung khan State Referral Hospital leh MIMERS atan sum hmuh a awm lo. Congress sorkar hun kum 1998-ah cheng vbc. 40.53 hmuh a ni a,, kum 2008-2018 chhungin CSS aṭangin cheng vbc. 189 leh NEDP aṭangin cheng vbc. 63 hmuh leh a ni.