Assam sorkarin NRC an tihchhuah hnuah Sorkarin hmalakna mumal a nei lo - MNYF

Mizo National Youth Front (MNYF) hruaitute chuan nimin khan Aizawl Press Club-ah thuthar thehdarhtute an kâwm a; an president Lalrinawma, MLA chuan, Assam sorkarin National Register of Citizens (NRC) draft list a tihchhuah hnuah dan loa Mizorama hnam dang an luh lohna atan sorkarin hmalakna mumal a neih loh thu a sawi.

Lalrinawma chuan, Assam NRC tihchhuah a nih hnuah Mizoram ṭhenawm state-te an inrálring nghal hle tih a sawi a, "Mizoram sorkar hmalakna hriat tur mumal a awm lo hi pawi kan ti hle. Zirlai pawl MZP-te kar hmasa Thawhṭanni aṭanga checkgate pathuma an duty leh kar khat chhung leka Assam NRC list-a tel lo Mizoram luh tum mi 400 chuang an man chhuak hi lawmawm kan ti tak zet a ni," a ti.

MNYF President chuan, MZP hmalakna an thlàwpzia lantirna atan August 27, Thawhṭanni khan Assam aṭanga Mizoram luhka pathum - Bairabi, Vairengte leh Saiphai police checkgate zinga pahnih Bairabi leh Vairengte police checkgate-a MZP duty-te an tlawh tih a sawi a, "A ṭul apianga an hman atan ṭanpuina hlan a ni," tiin, MZP-in Mizoram chhunga dân loa lut turte ven hna an thawk chu ropui an tih thu leh an thlàwp tlat thu a sawi.

Bairabi checkgate aṭangin August 2018 chhungin ILP nei lo leh foreigner (Assam NRC list-a tel lo) mi 60 vel thawn haw an ni tawh tih sawiin Lalrinawma chuan, "He lam kawng hi a chhiat em avangin zawh an tam vak lo niin a lang. Hei bakah Tlawng dung aṭangin engine boat hmanga lo lut rû an awma hriat a ni a, sorkar hian tlawng dunga duty post hawn belh thei se kan duh. Vairengte Police checkgate kan tlawh lai pawhin Assam NRC list-a chuang lo mi 26 thawn haw an ni," a ti.

MNYF President chuan, ILP pek chhuah danah sorkar khauh lehzual se an duh thu sawiin, "Temporary ILP an pek chhuahna form-ah hian, sponsor-tu hming leh address ziahna, phone number leh voter ID/PAN card no. dahna tur a awm a, tuna an kalpui danah chuan sponsor-tuah hming leh address lem phuahchawpin, sponsor-tu document dah tel ngai miah loin temporary ILP neih theih a ni," a ti a; ILP pek chhuahnaah NRC number phût tel ni se an duh thu a sawi.