KHAWTHLIR

Coaching hawng
Mizoram Youth Commission (MYC)-in Baptist Higher Secondary School (BHSS), Serkawna MYC & ALS Online IIT-JEE & NEET coaching an buatsaih chu nimin khan Lunglei IPRO C Lalremruati'n a hawng. Coaching atan hian zirlai 130 an inziaklut tawh a, VSAT Satellite C-Band hmangin Alternative Learning Systems (ALS), Delhi nen online class neih ṭhin tur a ni.

PRISM rally
PRISM party chuan nimin khan Chhimphei tlangdung, Aizawl South-III Assembly constituency chhung­ah campaign rally an huaihawt a; an president Vanlalruata'n thu sawiin, thingtlang khaw inawpna siamṭhat an tum a, V/C thuneihna sang zawk an pek dawn thu a sawi. PRISM-in rally an neihnate chu - Samlukhai, Sialsuk, Chamring, Sumsuih, Ṭhiak, Sateek, Aibawk, Tachhip, Muallungthu, Falkawn, Kelsih, Hualngohmun, Melriat, Melthum leh Hlimente a ni.

Building hawng
Border Area Development Project (BADP) sum cheng nuai 17 senga sak, Hmunhmelṭha High School building thar chu nimin khan bialtu MLA TT Zothansanga'n a hawng. Building hawn tâk hi a dung ft. 70 leh a vâng ft. 18-a zau a ni.

Signboard senghawi
Kolasib-a UDPA department chuan nimin khan Kolasib khawpui chhunga dan loa signboard târ, hun tiam an pek chhunga lak thlak lohte chu Town Sanitation Rules, 1980 tlawhchhanin an senghawi.

Sawiselna hun
Mizoram sorkar chuan thuchhuah siamin,National Highway (NH)-54 kawngpui zauhna leh siamna tura ram lak tum chung­changah heng village council hrang hrang huam chhung- Chhing­chhip, Chhingchhip Mualpui, Chhiahtlang, New Serchhip North, Bungtlang, Keiṭum leh Baktawng aṭanga sawisel duh nei tan ni 31.8.2018 chawhma dar 10 aṭang hian Serchhip DC conferrence hall-ah sawiselna hun hawn a nih dawn thu an tarlang.