NTUM-in nawrh an inhuam thu an puang
National Trade Union of Mizoram (NTUM) chuan nimin khan Aizawl Press Club-ah thuthar thehdarthtute kâwmin, sorkara an thil phût hrang hrangte an sawi a; nuar loin sorkarah an thil phût an thlen rualin, a ṭul chuan nawrh (strike) an inhuam tih an sawi.
NTUM president C Remtluanga chuan, nawrh chu an duh ber a ni lo tih sawiin, "Nuar lo thei lo dinhmunah mirethei ngaihsaktu kan sorkar hian min dah lui lo ang tih kan ringin kan beisei tlat a ni. Kan kal zel dan turah hian eng harsatna pawh lo thleng se, mipui hriatthiamna kan dil e," a ti.
C Remtluanga chuan, muster roll (MR) employee ṭhahnem tak sorkarin a pawmna (approval) chu August 27, 2018-ah tihfel a ni tih sawiin, "Sorkar chungah lawmthu kan sawi a ni," a ti a; a tihfelna turin kawng thui tak a la awm avangin, tihkhawtlai loha tihfel an beisei thu leh, post ruak awm sa chhunga 35% quota-a leng chin chu department tinah inthlan puan hma ngeia hnawh khah an duh thu a sawi.
NTUM President chuan, kum 2014-a DPAR department-in Government Gazette a chhuah ang chuan, kum 2014 hnu lama MR-a thawk tura lakte pawh exam leh personal interview paltlang ngei tura tih a nih tawh thu a sawi a, "Kum 2014 hnu lama lutte chu an exam ngei ngei a ngai a, hlawh pawh wages hnuaia pek tur an ni. Exam loa lâkte chu bàn vek tur a ni," a ti.
MR employee-te chu sorkar hnathawk pangngai anga ngaih an nih loh laiin hmun hla tak takah sawn (transfer) an ni ṭhin tih sawiin C Remtluanga chuan, "Transfer T.A pekna dan siamsak loin MR transfer tawh suh se. Transfer T.A tal min pek ve hma chuan transfer ni tawh lo se," a ti.
NTUM President chuan, MR employee sorkarin a approve thar zingah 8,000 vel chu post hnawhkhah turin a daih loh an awm dawn tih sawiin, "Kum 20-30 thawk tawhte an awm a, kum 60 tlina an hna aṭanga bàn an nih hma leh hnaa nghehna tur post ruak daih lohte tan category thar kan dil a ni," a ti a; category tharah chuan Minimum Wages aṭanga la chhuakin, pay structure thar leh chawlh lak phalsak (leave facility) ve an duh thu a sawi.
C Remtluanga chuan, MR zingah duty laia thi kum 2018 chhungin mi 10 vel an awm tawh tih sawiin, "An thih pawha arte thih mawl tawp a nih avangin, sorkar tana martar dik tak an ni. Duty laia chesualte leh thite hi zangnadawmna, Payment of Gratuity Act 1972 ang hian min pe ve rawh se," a ti.
NTUM President chuan, Labour Law-in a phal anga thla ruk dana Variable Dearness Allowance ni tin Rs. 40 vela hlawh tihpunna tur, May 15, 2018- a Minimum Wages Board-in a pass tawh chu 7th. Pay ruala tihfel an phût thu leh, Professional Tax an chawi zat tidanglam tura sorkar an ngenna tihfel a nih hma chuan professional tax chawi rih loh an duh thu a sawi bawk.