Court-a thubuai neite hnâwl turin mipui chah

Ṭangrual pawl Zoram Peoples' Movement (ZPM) chuan thuchhuah siamin, Court-a thubuai neite hruaitu atan hnâwl ngam a hun tawh thu an tarlang a; kumina Mizoram inthlanpui awm turah mipuite chu an duhthlanna thiang taka hmanga vote thlak tur leh an mi duh ngeite thlang turin an chah.

ZPM chuan, kum tawp lama inthlanpui lo thleng tur atan tunlai hian inbuatsaihna neih mek a ni tih sawin, "Kristianna nena inmila politics a kal a ngaih tawhzia sawiin Zoram mipuite'n duhthlanna thiang tak hmanga vote thlak a, kan duh tak ngei chauh thlang turin mipui kan ngen a ni," an ti.

Mizoram, Kristian ramah hlem­hlêtnain bu a khuar thûk tawh hle tih sawiin ZPM chuan, "Mipui lam pawh kan dik tâwk lo a, a thlawna sum dawn kan tum tlat ṭhin a, hruaitute pawhin a thlawna sum sem tumin mipuiah an inzuar mek bawk. Rorel lai Congress phei chuan NLUP sem tumin hma an la mek a ni," an ti a; sum sem hmanga mipui hneh tuma hmalakna chu an duh lo tak zet tih an sawi.

Mizoram chu Pathianin hruaitu mi chi hrang hrang a lo pe tawh tih sawiin, hruaitu ṭhenkhat chu chanchin ngaihnawm tak tak sawi zui tur nei an nih laiin, ṭhenkhatte chu tun thlenga thubuai nei leh Court-a kal fo ngaite an la ni tih an sawi a, "Hetiang hi ZPM chuan zahthlak kan ti hle. Case nei reng chunga ram rorelna sanga ṭhut tum an la ni hi kan Kristianna nen a inmil loh avangin mipuite'n kan hnâwl ngam a hun tawh a, kohhran mi leh fak tlakte'n ram rorelna fawng an chelh a hun tawh a ni," an ti.

ZPM chuan, tunlaiin mi ṭhenkhatin vote zawn nan sum sem an sawi a, a ṭhenin sorkar hna leh contract hna an tiam bawk tih sawiin, "Hetiang hian mipui rilru a tihkhawloh avangin mipuite'n politics ṭha loa bual âta kan awm loh nan rilru fim kan neih a pawimawh a ni," an ti. Mizoramin hruaitu ṭha a neih theih nan kohhran mite leh ram hmangaihtute ṭawngṭaina chu Pathianin a chhan ngei an beisei thu leh, politician-te'n an tih theih loh tur chu tiam tawh lo se an duh thu an sawi bawk.