Champhaiah lemziak leh cheimawi hmangin inel

Champhai Town Sanitation Task Force chuan, nimin khan Champhai IPR conference hall-ah High School Level Drawing and Painting Competition an buatsaih a, Champhai khawpui chhunga high school 13 aṭangin zirlai 36 te an tel a, intihsiakna kaltlang hian lemziak leh cheimawi hmanga fai inzirtirna leh pholanna neih a ni.

Intihsiaknaah hian pakhatna chu Remruatfeli, Bethel Mission School niin, Rs. 3000 leh certificate a dawng a, pahnihna JH Lallianpari, Bethel Mission School chuan Rs. 2000 leh certificate dawngin, pathumna Lallawmawma, PES Zotlang chuan Rs. 1000 leh certificate dawng.

Fai inzirtirna hmanga lemziak leh cheimawi intihsiakna hi Mizoram khawpui fai inelna kal­puina kentel, a zau thei ang bera mipuite hnena faina kawnga zirtirna thleng pha tur siamna a ni. Lemziak leh cheimawi ṭha bikte chu khawlai ualau laia bangahte nemkai tur a ruahmanna kalpui a ni.