Mizoram electoral roll siam tharah Tripura-a Bru-te paih a la ni lo

January 15, 2022-a Mizoram Electoral Roll 2022 tlangzarh tâkah Tripura relief camp-a awm Bru-te paih a ni lo. Tripura-a Bru awm mi 11,772 chuan Mizoramah vote an la nei mek.

Mizoram Election depart­ment aṭanga Vanglaini-in thu a dawn danin, Mizoram Electoral Roll thar berah hian Tripura-a Bru-te paih an ni lo a, thun thar pawh an awm lo. Electoral roll aṭanga Bru-te paih tur chuan Tripura sorkarin chhawmdawlna an dawn tur ang a pek kim a, electoral roll-a an thun phawt a ngai a ni.

Tripura sorkar chuan tunlai hian inremna angin an state-a awm hlen duh zawk Bru-te chu chhawmdawlna an pe mek a, chhawmdawlna an dawn tur ang ang an dawn hma chuan electoral roll aṭanga paih theih an ni lo.

Mizoram aṭang chuan Bru-te electoral roll aṭanga paih a nih theihna turin thil pawimawhte Election Commission of India (ECI)-ah thawn a ni tawh a; Tripura sorkarin a tih turte a tih hunah Bru-te chu Mizoram electoral roll aṭanga paih ECI-in an remtih nghal beisei a ni.

Kum 2020 tìr lamah khan sorkar laipui, Tripura sorkar leh Mizoram sorkar leh Bru pawl aiawhte chuan inremna an ziak. Inremna an ziah dan chuan, Tripura-a awm Bru zingah Mizorama kîr duh an awm chuan an kîr ang a, kîr duh lote chu Tripura-ah an awm zui thei a ni.

Inremna anga hamṭhatna pek turte chu Bru chhungkua 5,400 vela mi 34,000 velin an hmu thei dawn. Bru refugee-te chu an awmna tur ram ft. 40X30-a zau pek tur a ni a, fixed deposit-in Rs 4,00,000 dahsak tur an nih bakah, kum hnih chhung thla tin Rs 5,000 leh a thlawnin ration pek tur a ni bawk.

Tun dinhmunah Tripura relief camp-a awm Bru zinga Mizorama vote nei mi 11,772 zinga mi 8,885 chuan Mamit district-ah vote an nei a, mi 1,979-in Kolasib district-ah leh mi 908-in Lunglei district-ah vote an nei a ni.