Lawngtlai dist-ah ráltlân 4,826 awm mek

Lawngtlai District Committee on Myanmar Refugees chu an chairman Dr Andrew H Vanlaldika, district bawrhsap kaihhruaiin nimin khan DC conference hall-ah a vawi khat nan an ṭhukhawm a; an district chhungah Myanmar ráltlân 4,826 an awm mek thu tarlan a ni.

Dr Andrew H Vanlaldika chuan, District Committee on Myanmar Refugees chu High Level Committee on Myanmar Refugees rorel bawhzuia din a nih thu a sawi a, “Myanmar ram buaina avangin Lawngtlai district-ah ráltlân eng emaw zat an lo lut tawh a, anmahni chhawmdawlna kawnga theihtawp chhuahtu Young Lai Association, kohhran, tlawmngai pawl leh mipui inpekna a lawmawm hle,” a ti.

Task Group on Myanmar Refugees nodal officer TT Beikhaizi, SDO (Sadar) chuan Lawngtlai district-a Myanmar ráltlân dinhmun tlangpui a tarlang a, Central YLA hruaitute’n ráltlân an buaipui tawh dan an sawi.

Ṭhutkhawmah hian, Myanmar ráltlân awm mekte leh la thlen belh turte khawsakna tur, ei leh in, damdawi leh an mamawh tur hrang hrang phuhrûk dan turte an rêl a ni.

Tarlan danin, Lawngtlai district-ah hian Myanmar ráltlân 4,826 awm mekin, mipa 2,572 leh hmeichhia 2,254 an ni a; an zinga mi 3,241 chu kum 12 chung lam niin, kum 12 hnuai lam mi 1,585 an awm bawk.