Lalpa hming lam tlattu CM kan nei - MNF Sr. Vice President

MNF chuan nimin khan kum 2022 atan Mizo Hnam Run hawngin, hawnna inkhawm an buatsaih a; thu sawitu MNF senior vice president Tawnluia chuan, chief minister Zoramthanga chu Lalpa hming lam tlattu a nih thu a sawi.

MNF vice president Lalthlengliana kaihhruai inkhawmah Tawnluia chuan, an fel emaw, fel lo emaw, MNF chu Mizo hnam tung ding tura Pathianin a buatsaih nia sawiin, "Social media leh titinaahte min bei ṭhin mah se, hengte hi Lalpa chakna hmangin kan hneh thei. Lalpa hming lam tlattu CM kan nei tih hi a hre chiangtu ka ni ve. Pathian au zel ila, he hnam hi chhanchhuahin a awm zel ang," a ti.

'Pathian leh kan ram tan' tih thupuia neiin Mizo hnam rawngbawl turin MNF din a nih thu sawiin Tawnluia chuan, "Kan thiamna, finna, ropuina leh hausaknate chhuang thei kan ni lo. Pathian hming lam chung zelin hnam rawng bâwl kan tum. Mi sawisel leh dem hman a ni lo, kan ramin chhan a ngai," a ti a; Mizo mipui rawngbawl turin MNF a ding tlat niin a sawi.

MNF Sr Vice President chuan, independence an sualnaah MNF chu India kutah an inpe (surrender) lo tih sawiin, "Remna a awm theihna atan kan ralthuam kan dah a ni. Mizo nationalism kan rilrua awm hi surrender theih a ni lo," a ti.

Aizawl khawpui lailía Assam Rifles sawn chhuak turin Laldenga hun laiin Zokhawsangah ram pek a ni tih sawiin Tawnluia chuan, "Kum 10 Congress khan an ngaihsak lo a, Pu Rama sorkar lo dingin, ngaihtuah a ni a, nawr leh a ni. AR-te hi chhuak thei turin an inbuatsaih mek zel," a ti a; AR-te chhuahsan ram chu vantlang tan liau liau hman a nih tur thu a sawi.

Tawnluia chuan, ṭhalai mithiamte'n MNF an bêl nia sawiin, "Mi thar kan lawm lut zel hian MNF kaihhruai sorkar hian rin a la hlawh a, he hnam leh ram hruai turin rin a la hlawh a ni tih a lantir a ni," a ti a; MNF diamond jubilee puala buatsaih calendar a tlangzarh nghal.

MNF party thuchhuah tarlan danin, nimin khan an partyah mi 30 lawm luh an ni a, chu'ng zingah chuan MZP vice president kal chhuak Peter Chhangte a tel a ni.