Champhai DC transfer order sût phûtah sorkar la ngaichâng

Champhai District NGO Coordination Committee-in Champhai bawrhsap Maria CT Zuali sawnna thupek (transfer order) sût tura Mizoram sorkar an phût chungchangah nimin tlai thleng khan sorkar aṭangin thu dawn an la nei lo a, sorkar an la ngaichâng.

Vanglaini palai zawhna chhangin Champhai District Joint NGO chairman Lalnunmawia chuan, an thil phût chungchangah sorkar aṭangin thu dawn an la nei lo tih an sawi a, “January 18 (vawiin) thleng sorkar kan ngaichâng ang a, thu dawn kan neih loh chuan hmalak zel dan tur ngaihtuahin naktukah kan ṭhukhawm leh ang,” a ti.

Lalnunmawia chuan, "Kan DC hian sorkar thu a kengkawh a, sorkar laipui aṭangin Chief Secretary-ah kuhva rah tawlh ruk titawp tura lehkha lo thleng chu DC-ah an hriattir leh a, chumi tihhlawhtlin tumtu chu a ni. Sorkar thupek zawmtu DC a nih angin a transfer order sut turin sorkar kan ngen a, an dah tumna post-te hi a chelhtu pawh awm ngai mang lo a ni a, hremna ang lek lekin a lang thei a ni. Kan DC hian sorkar a kalh lo a, sorkar a thlawp tlat zawk a, chutiang mi chu keini pawhin kan thlawp a ni," a ti.