KHAWTHLIR

Mi 7,74,435-in Vaccine la tawh
January 16, 2022 thleng khan Mizorama mi 7,74,435 hnenah Covid-19 vaccine dose 13,82,340 pek a ni tawh a; kum 18 leh a chung lam bikah mi 7,40,326 hnenah dose khatna pek tawh niin, hei hi pek tur zat ruahman aṭangin 96% a tling.Mi 6,03,941 hnenah Covid vaccine dose hnihna pek a ni tawh a, chu chu dose khatna la tawh aṭangin 78% a ni. Kum 15-18 inkar mi 33,849 hnenah dose khatna pek tawh a ni tawh a, pek tur zata chhût aṭangin 51% a tling tawh. January 15, Inrinni thlengin mi 6,162 hnenah precautionary dose pek a ni tawh.

Serchhip DC thar
Serchhip bawrhsap thar Nazuk Kumar, IAS chuan nimin khan district commissioner mawhphurhna a la ṭan a, Kumar Abhishek, IAS a thlâk. Nazuk Kumar hi IAS 2016 batch, AGMUT cadre a ni a, Higher & Technical Education director aṭangin Serchhip DC turin sawn a ni. A thlâk tâk Kumar Abhishek chu Delhi-a awm tura tih a ni thung.

Chetsualnaah thi
Nimin chhun dar 11 vel khan Kawrthah leh Rengdil inkarah truck leh bike an insú a, bike neitu leh khalhtu Lalrinsanga s/o K Laltlanliana, Zamuang chu a hmunah a thi. Bike-a chuang ve dang Zairemkima a hliam bawk.

Khua khuahkhirh
Aizawl district bawrhsap Dr Lalhriatzuali Ralte chuan Covid-19 darh zel tur vèn nan Lungsei leh Sailam khua chu nimin chawhma dar 10 aṭang khan hmun khuahkhirh bik, restricted area-ah a puang. North Serzawl khua pawh containment zone-ah a puang bawk.

Hnahthial MJA-in Lawmthu sawi
Mizoram Journalists' Association (MJA), Hnahthial district chuan thuchhuah siamin, January 14, 2022-ah MJA district puitlinga hlân kai an ni ta chu lawmawm an tih thu an tarlang a, "Kan ram leh hnam tan tu pawh a thawhpui thei a, district MJA-te bakah, sorkar leh NGO zawng zawngte thawhhopuiah kan sáwm a che u," an ti.