Ṭum thum revised hnuah pawh NH 44A la siam chhunzawm lo

Mamit district aṭanga Tripura pawhna tur kawngpui National Highway 44A siam hna thawh mekah a ṭum thumna atan revised estimate pawm a ni tawh a, chuti chung chuan hna thawh chhunzawm a la ni lo.

NH-44A siamna atan hian a ṭum thumna atan nikum khan revised estimate siam a ni a, Ministry of Road Transport & Highways chuan December 15, 2021 khan revised estimate pawm a nihna order a tichhuak a, hna thawh hun chhung pawhsei a ni. NH-44A atan hian a tìrah chuan cheng vbc. vbc. 624.41 ruahman a ni a, a ṭum thumna atana revised estimate pawm a nih tâkah chuan cheng vbc. 1,109.88 sên a ni dawn ta a ni.

Mamit aṭanga thu dawn danin, NH-44A kawngpui siam hna chhunzawm a la ni lo a, hna neitu Gayatri leh hna thawktu Ratna company inkarah harsatna lian tak a awm mek a, chuvang chuan hna thawh chhunzawm a ni lo.

Thuthar thehdarhtute zawhna chhanga PWD hotute sawi danin, hna neitu leh thawktu company pahnih inkara harsatna awm chu MoRTH pawhin a hria a, chingfel tura hmalak mek a ni.

Mizoram sorkar leh sorkar laipui (MoRTH) hotute ruahman angin tuna kawng siamna tura sum pek belh tur pawh Ratna kuta lut tura tih a ni a, chu chu Gayatri pawhin a pawmpui a; mahse, Gayatri hian bank lamah bá an ngah avangin bank lamin an remti lo.

Hna neitu Gayatri hian hna thawktu Ratna chu sum eng emaw zat an hrènsak a, chuvang chuan Ratna hian an kuta sum a luh loh chuan hna an thawk ngam tawh lo. Ratna neitu leh MoRTH thuneitute nen hma an la mek a, harsatnate chinfel a nih veleh hna thawh chhunzawm a ni ang.

NH-44A atan hian a tìrah cheng vbc. 624.41 ruahman niin, hna thawh a nih aṭanga kum lina, kum 2015 khan revised estimate siamin sum ennawn a ni a, cheng vbc. 713.5-ah tihpun a ni. Kum 2018 khan revise estimate siam leh niin, cheng vbc. 992.67-ah tihpun leh a ni a; a ṭum thumna atan revised estimate siam lehin, cheng vbc. 1,109.88-ah tihsan leh a ni bawk. Revised estimate ṭum thuma hi MoRTH chuan a pawm tawh a ni.