African Swine Fever bawhzui turin MLA Lalmuanpuia ruat a ni

SEDP hnuaia Veterinary and Sericulture Board chuan nimin khan Animal Husbandry & Veterinary (AH&Vety) minister Dr K Beichhua hoin Secretariat conference hall-ah an hmalakna leh hmachhawpte an sawiho. African Swine Fever (ASF) vanga ran vulhtute hamṭhatna leh zangnadawmna ngaihtuah tur leh a ṭul anga hotute hmu turin board vice chairman C Lalmuanpuia, MLA an ruat.

Minister Dr K Beichhua chuan, SEDP hnuaia board hrang hrangte kum kal taah Covid-19 lêng avangin duh angin an inhmu khawm thei lo tih sawiin, “Kum tharah tha thar leh beiseina thar nen hmalakna tur thlirho a, kum hmasa lama pilot project kan kalpui tawhte sawiho a ṭul,” a ti a; SEDP hnuaia beneficiary-te dinhmun hriat chian a ṭul thu leh Aizawl district bikah spot verification neih a nih tur thu a sawi.

Ṭhutkhawma tarlan danin, SEDP kaltlanga Sericulture department hmalakna tarlan a ni a, kum 2019-20 chhunga pilot project beneficiary-te hnenah first instalment leh second instalment pek a nih tawh.

Zokhawthara Animal Quarantine Centre chu cheng nuai 35.28 sênga sak zawh a ni tawh a, Mamit district-ah spot verification tih tawh niin, beneficiary-te’n ṭha takin hma an la tih tarlan a ni. Pilot project kal mek bakah, Mamit district-a khaw pariat aṭangin beneficiary thar mi 43 chu department-in a ziak lut a ni.

AH&Vety department chuan ASF vanga Mizorama harsatna hrang hrang an tarlang a, ran vulhtute hamṭhatna leh zangnadawmna ngaihtuah tur leh a ṭul anga hotute hmu turin Veterinary and Sericulture Board vice chairman C Lalmuanpuia, MLA an ruat. Revised Estimated Cost for Piggery & Poultry Farming under SEDP 2022-23 an thlirho bawk.