Champhai dist-a bank hmalakna sawiho

Champhai District Consultative Committee (DCC)/ District Level Review Committee (DLRC) chuan nimin khan an chairman Maria CT Zuali, bawrhsap hoin DC conference hall-ah an ṭhu a; September-December 2021 chhunga Champhai district RD Block pahniha bank leh stakeholder-te hmalakna an thlirho.

Maria CT Zuali chuan, loneitu leh ran vulhtute hamṭhatna ngaihvena bank ṭhenkhatin hma an la chu lawmawm a tih thu a sawi a, “Kut hnathawktu leh loneitute chawi kâng turin theihtawp chhuah zel u la, line department-a thawktute pawh bank leh loneitute inkarah palai hna thawkin suih zawmtu nih tum ang che u,” a ti.

Bank-a pawisa dah luh emaw, bank-in pawisa a dawn tam ang hûa loan pek kawnga an inhawng tâwk lo chu veiawm a tih thu sawiin Maria CT Zuali chuan, “Hamṭhatna dawng thei turte hrilh loh avanga loan pek ṭhat loh awm theite chingfelin, a ṭul angin bawhzui ang che u,” a ti a; mi retheite chawi kân kawnga ṭhahnemngai taka thawk tur leh financial literacy campaign tam zawk nei turin bank hotute a chah.

Ṭhutkhawma tarlan danin, September-December 2021 chhung khan Champhai district-a bank 17-te credit deposit ratio (CD ratio) chawhrual chu 48.36 % a ni a, June-August 2021 CD Ratio 43.14 % aṭangin 5.22%-in a pung a, CD Ratio bituk zat 60% an la pha lo thung.