Covid-19 vei hmuh thar zingah symptom nei 72.65% an awm

January 16, Pathianni khan Mizoramah Covid-19 vei mi 223 hmuh chhuah a ni a, an zinga mi 162-in symptom neiin, 72.65% an tling. Nimin khan hripui vei dam tawh mi 830 chhuahtir an ni a, mi pahnih an thi.

Covid-19 vei hmuh thar mi 223-te chu mipa 86 leh hmeichhia 137 an ni a; TrueNAT hmanga hmuh 18, RAT hmanga hmuh 203 leh FIA hmanga hmuh pahnih niin, positivity rate chu 11.28% a ni. ZMC laboratory-ah swab sample endik a ni lo.

Sample endikna district pasarih zingah positivity percentage 10% aia a sànna district panga a awm a, a sànna ber Lawngtlai district-ah 100% a ni a, Aizawlah 30.31%, Mamitah 16.27%, Lungleiah 12.50% leh Serchhipah 12.31% a ni. Siaha, Champhai, Khawzawl leh Hnahthial district-ah sample endik a ni lo.

IPR tarlan danin, hripui vei mi 10 aia tam hmuhna khua/hmun pahnih a awm a, Jeriko Khualbuk, Durtlang North-ah leh Hmunṭha khuaa mi 16 ve ve hmuh chhuah niin, symptom nei vek an ni.

Nimin tlai dar 5 thleng khan hripui vei dam tawh mi 830 chhuahtir an ni a; district tina chhuak zat chu - Khawzawlah 287, Aizawlah 251, Lawngtlaiah 60, Lungleiah 58, Champhai leh Mamitah 56 ve ve, Saitualah 48 leh Hnahthialah 14 an ni.

IDSP record angin, Mizoramah Covid-19 vei 1,52,478 hmuh chhuah a ni tawh a, mipa 73,067 leh hmeichhia 79,411 an ni. Nimin tlai dar 5 thleng khan mi 1,44,316 (94.65%) chhuahtir an ni tawh a, mi 572 (0.38%) thi tawhin, enkawl mek mi 7,590 (4.97%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,52,478 chu mi 1,000 zelah hripui vei mi 139 an awm ang a ni a; mi 1,00,000 zela Covid-19 vangin mi 52 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 16, 2021 thlenga swab sample endik tawh 15,81,208 aṭanga RT-PCR hmanga endik zat percentage chu 21.13 a ni a, RAT hmanga endik zat chu 73.08% a tling.