Hri danna pek dan tur sawiho a ni

State Task Force on Immunization chu an chairman R Lalramnghaka, Health secretary ni bawk hoin nimin khan Directorate of Health & Medical Education (DHME) conference hall-ah an ṭhu a; Covid-19 vaccine leh vaccine dang kumina pek tur chungchang an sawiho.

Ṭhutkhawmah hian Covid-19 vaccine peknaa hmalakna kal mek te, zenghri danna (pulse polio vaccine), routine immunization leh Mission Indradanush-a hmalak dan turte sawiho a ni.

Sorkai laipui chuan thla tin health sub-centre-ah routine immunization a kalpui a, naupang leh nu, nau pâite tan vaccine chi hrang hrang pek ṭhin a ni. Covid-19 léng avangin hmun tam takah routine immunization a khaihlak tih an tarlang.

State Task Force on Immmunization chuan a hunbi anga tluang taka routine immunization kalpui a nih theih nan khua/veng tina Village Health Nutrition and Sanitation Committee-te chu uluk taka lo enpui ṭhin turin an ngen a; Covid-19 laka himna tur inkaihhruaina zawm harsatna hmun health sub-centre-ahte him taka routine immunization kalpui a nih theih nan VC/LC leh YMA-te nen hmun remchang zawk ruahman turin an ngen bawk.

Ṭhutkhawma tarlan ṭhenkhat
 Naupang kum 2 hnuai lam leh nu, nau pâite’n a hun taka hri danna an lak theihna tura beihpui thlakna, Mission Indradanush chu December 25, 2014 aṭangin India ram pumah kalpui a ni.
 Intensified Mission Indradanush 4.0 chu February 7, 2022-a ṭan tur a ni a, naupang kum 7 hnuai lam, hri danna an dawn tur ang la dawng lote chu a ṭul angin hri danna pek a ni dawn.
 Zeng hri danna pek beihpui thlakna chu March 1-3, 2022 chhunga neih tur a ni a, naupang kum 5 hnuai lamte hnenah OPV vaccine pek vek tur a ni.
 March 1, 2022-ah khua/veng tina vaccine pekna booth-ah zeng hri danna pek a ni ang a, vaccine pekna hmun tur chu la inhriattir leh a ni ang.
 India ram pum leh Mizoramah zeng hri ûm bo ni tawh mah se, ram ṭhenawm Pakistan leh Afghanistan-ahte a la awm avang leh inkai darh a awlsam avangin a hunbi-ah la pek chhuah zel a ni.