Lawngtlai ah kangmei ven dan tur sawiho

Lawngtlai District Level Committee on Fire Prevention chu nimin khan an chairman, Dr Andrew H Vanlaldika, DC hoin DC conference hall-ah an ṭhukhawm a, kangmei ven kawnga hmalak dan tur hrang hrang an sawi ho.

Dr Andrew H. Vanlaldika chuan nikum lamah Mizoram hmun hrang hrangah kangmei vanga harsatna nasa tak thlengin, ram mipuite pawhin an buai phah hle tih sawiin, "Kha kha kangmei ven pawimawhzia leh nasa zawka ṭan lak a ṭulzia tilangtu niin ka hria. Kangmei a chhuah tawh hnua ṭhelh mih tum chu tha leh zung, sum leh pai sen a hautak em avangin a chhuah hmaa lo inven lawkna lam chu ngaih pawimawh lehzual a ṭul," a ti.

Meeting-ah hian February 7 - 12, 2022 chhunga hman tur Fire Prevention Week 2022 hawnna chu DC conference hall-ah buatsaih te, district chhunga kangmei venna lam inzirtirna (awareness campaign) uar zawka buatsaihte leh video clip siam leh thuziak (hoarding board) tarte an rel a ni.