Kum 2023-ah sorkarah kan tel dawn - PC Vice President

Peoples’ Conference (PC) party chuan nimin khan kum 2022 atan an party pisa an hawng a; thu sawitu Lalrinzuala Chawngthu, vice president chuan, kum 2023 inthlanpuiah an policy tihhlawhtlin duhtu apiang thawhpuiin sorkarah an tel dawn niin a sawi.

PC party pisa hawnna inkhawm hi an senior vice president Vanlalruata’n a kaihruai a; Lalrinzuala Chawngthu chuan, “Kum 2023 inthlanpuiah PC party policy tihhlawhtlin duhtu apiangte thawhpuiin, sorkara kan tel tur thu kan president Pu Lalhmangaiha Sailo-in a lo sawi tawh chu vawiinah hian ka puang thar leh a, tunah hian inthlanpui thlirin party dang nen inbiak chhoh mek a ni,” a ti.

Lalrinzuala Chawngthu chuan, “Brig. T Sailo policy - Basic Needs a hlawhtlinna a taka Mizoramin kan hmuh theih hun tur thlir chungin, kum 2023 sorkar thar piang turah a fawng chelhtute zingah kan tel ngei dawn a ni,” a ti bawk.

PC Vice President chuan, “Dan loa kuhva tawlh hian Mizoram hi sumdawnna hmunpui pawimawh tak, Myanmar leh khawchhak ramte leh India leh Bangladesh-te’n min kárcheh remchanna hi keini tan sum siam nan kan hmang ṭangkai hlauh thei tih a tichiang ta em em a ni,” a ti a, Mizo ṭhalaite tana remchanna siam nana hma la turin MNF sorkar an ngen tih a sawi.