RUSA-a thawkte’n hlawh an la lo rei Group A leh B-te hlawh pek chhuah a ni

Rashtriya Uchchatar Shiksha Abhiyan (RUSA) hnuaia college-a zirtirtu assistant professor-te chuan thla riat chhung hlawh an la tawh lo; sorkar laipui aṭangin sum a rawn kal mumal loh vang niin an sawi. Hetih lai hian, sorkar hnathawk group A leh B-te hlawh tur chu nimin khan Treasury aṭangin pek chhuah a ni.

RUSA hnuaia assistant professor-te hnen aṭanga thu dawn danin, April 2021 thleng hlawh an la a, May 2021 aṭanga tun thlengin hlawh an la tawh lo a ni. RUSA assistant professor-te chuan an hlawh chungchangah sorkar hotute an dawr ve ṭhin a, hlawh an lâk theih loh chhan chu sorkar laipuiin sum a rawn pek loh vang niin sorkar hotute chuan an lo hrilh ṭhin.

Finance commissioner Vanlalchhuanga chuan zawhna chhângin, RUSA sum rawn kal dan chu a hriat chian mai theih rih loh thu leh a rawn kal khât viau nia a hriat thu a sawi a, “Central lamin an release lo a ni ang, expenditure sanction dilna leh release proposal vel hi tun hnaiah ka hmuh ka hre meuh lo,” a ti.

Hetih lai hian, RUSA assistant professor-te chungchangah hian court-ah thubuai a awm mek nia thu dawn a ni bawk.

Finance Commissioner chuan, Mizoram sorkar hnathawk group A leh B-te December 2021 hlawh tur chu nimin khan pek chhuah a nih thu Vanglaini palai a hrilh. Treasury aṭanga pek chhuah a nih chuan an awmna department lama a khawihtute’n an bank account-ah an thun nghal mai tura ngaih a ni.

Group A leh B-te hian nikum lam aṭang khan hlawh lâk hun pangngaiah hlawh an la thei lo ṭhin a, nikum December thla hlawh pawh thla chanve chuang an la thei lo tawh a ni.