MBBS zir tur thlanna dan 'stay' sût a ni ; MBBS/BDS counselling chhunzawm nghal

Gauhati High Court, Aizawl Bench chuan The Mizoram (Selection of Candidates for Higher Technical Courses) Rules, 2016, hman theih loh tura a dah (stay) mek chu August 28, 2018 khan a sût (vacate). Hei vang hian, Higher & Technical Education department-a Technical Wing chuan August 28, Thawhlehni zan leh nimin khan MBBS leh BDS zir tur thlanna counselling an ti nghal a; MBBS zir tura thlan zingah Chakma pakhat a tel.

Tarlan tawh angin, Gauhati High Court hian he Mizoram (Selection of Candidates for Higher Technical Courses) Rules, 2016-a Rules 5 chu June 24, 2016-ah a lo stay tawh a; stay a nih chhunga hearing-ah thubuai (writ petition) thehluttu lamte an inlan ngai loh avangin HC Division Bench chuan May 2, 2018-ah stay order chu a sût a ni.

Petition thehluttute chuan stay order lo chhuah tawh chu tinung leh turin June 11, 2018-ah High Court an ngen leh a, High Court pawhin August 18, 2018-ah stay order a lo chhuah tawh chu a tinung leh a; HTE Technical Wing-in MBBS leh BDS zir tur thlanna counselling a kalpui mek pawh tihtawp nghal a ni.

August 28, Thawhlehnia Gauhati High Court order-in a tarlan danin, High Court-in August 18, 2018-a stay order a chhuah laiin Mizoram sorkarin MBBS zir tur thlanna chu 75% a zawh hman tawh avang leh, MBBS seat la hnawhkhah lohte chu writ petition vanga hnawhkhah loha a liam mai loh nan Mizoram sorkar chu a dan hman mek anga MBBS seat hnawhkhah phalsak a ni ta a ni.

Chief Justice Ajit Singh leh judge Jus­tice Manojit Bhuyan-te ṭhutna High Court Bench order-ah hian, The Mizoram (Selection of Candidates for Higher Technical Courses) Rules, 2016 anga MBBS admission kaihhnawih tih Mizoram sorkar a phalsak lai hian, thubuaiah thutlukna (final decision) siam a nih hma chuan medical college-a admission tih erawh phal a nih loh thu tarlan a ni thung.

High Court-in The Mizoram (Selection of Candidates for Higher Technical Courses) Rules, 2016 a stay-na a sût avang hian HTE department chuan August 28, Thawhlehni zan khan dar 8 aṭangin MBBS leh BDS counselling an chhunzawm nghal a; an zawh hman lohte chu nimin khan tih leh niin, Chakma zirlai pakhat chu MBBS seat pek a ni.

HTE joint director K Zodingliana chuan, Thawhehni zanah hian zirlai 100 an ko a, chu'ng zinga zirlai 40 chu counselling an tihpui hman tih a sawi a, "Chakma zirlai pakhat chu Category-II quota-a luah khat turin koh tel a ni a, counselling tihpui a ni a, MBBS seat pek a ni," a ti.

K Zodingliana chuan, High Court-in Rules a stay hmain counselling round hnih an tih hma thu sawiin, "Chumiah chuan NEC-a seat leh MIMER-ah seat 62 kan allot hman. NEC-a MBBS seat pakhat leh BDS seat pahnihte leh, Central pool-a MBBS seat 18 leh BDS seat pasarihte allotment ti turin counselling kan ti chûk chûk a, a ṭul chuan kan tlaivar ang," a ti a; MBBS admission chu a tlangpuiin August 31 hi last date a nih thu leh, college ṭhenkhatah chuan vawiin hi last date a nih thu a sawi.

HTE Joint Director sawi danin, Thawhlehni zan khan NEC leh Central pool-a seat zawng zawng counselling tih zawh vek an tum a, nimin khan MIMER-a seat la awmte hnawhkhah leh an tum bawk.

HTE Joint Director chuan, "Zirlaite'n seat an chàn loh nan theihtawp kan chhuah a, a hunah tihfel ngei kan tum. Naktuk (August 29)-ah Health department-ah bond an sign ang a, a hma thei ang berin an zirna hmun an pan ang," tiin Thawhlehni zan khan a sawi.