District zirchianna lehkhabu tlangzarh

MIRSAC buatsaih, 'Hazard Risk and Vul­ne­rability Analysis of Aizawl, Mamit and Serchhip' chu nimin khan Directorate of Science & Technology (ST) conference room-ah Planning minister Lalsawta'n a tlangzarh.

Lalsawta chuan, Mi­zoram chu chhiatrupna thlen theihna hmun a nih avangin invenna leh inpuahchahna ṭha a pawimawh tih a sawi a, "Analysis data-te hi dahṭhat ringawt mai a tâwk lo a, a tak taka zira buaipui zui a ngai. Chhiatrupna lo thleng se, inhliamte enkawlna leh hmun him ṭha zawk buatsaih hi a ngai tak zet a, hemi chung changah hian ngaihtuahna sen mek a ni," a ti.

Planning Minister chuan, chhiatrupna a thlena invenna tur atan sorkar inbuatsaihna chauh a tâwk lo tih sawiin, "Mimal inbuatsaihna, in chhungah leh mahni awmna hmuna emergency aid neih lâwkte hi a finthlak em em a ni," a ti a; inbuatsaihna ṭha nei turin department pakhat chauh ni loin, department hrang hrangte nena thawhho leh inràwn tawn a pawimawh thu a sawi.

Inkhawm hi MIRSAC chief scientific offier Dr RK Lallianthanga'n a kaihruai a, senior scientist ZD Lalṭanpuia'n Aizawl, Mamit leh Serchhip district-a an hmalakna tlangpui a sawifiah a ni.