Union Minister-in Wellness Centre a hawng

ITI Venga Urban Primary Health Centre-a National Health Mi­ssion (NHM) aṭanga Urban Primary Health & Wellness Centre (UPHWC) din thar chu, nimin khan Union minister of state for Health & Family Welfare Anupriya Patel-i'n a hawng.

Urban Primary Health & Wellness Cen­tre hawnna hi Health secretary Lalrinliana Fanai-in a kaihruai a; Anupriya Patel chuan, Mizoram Health Minister hmalakna hnuaiah Mizoramin health care-ah hma a sawn nasat thu sawiin, "Sorkar laipui chu Mizorama health care lama hmalaknate thuam chak turin a inhuam a, sorkar laipui hi mipui tan a ding a, Mizoram mipui tan a ding a, hriselna lamah nasa takin hma a laksak dawn a ni," a ti.

Anupriya Patel chuan, NHM hnuaia hma­lakna chi hnih - primary healthcare leh secondary Healthcare kaltlangin Reproductive & Child Health (RCH) leh communicable disease-a hmalaknaah hlawhtlinna tam tak a awm laiin, heng hmalakna pahnihin a huam tel lohah harsatna a awm mek tih a sawi.

Union Health Minis­ter chuan, cancer leh zunthlum vei an pung a, lung natna leh thisen sánga vanga harsatna tâwk an pun nasat avang­in sorkarin primary healthcare lian tham leh huapzo zawk a ngaihtuah chhuak tih a sawi a, "Chu chu Ayushman Bharat Programme a ni," a ti.

Union Minister sawi danin, Ayushman Bharat Programme-a ban pakhat zawk National Health Protection Mission hmang-in insurance kum khat­ah chungkaw pakhat tan Rs. 5,00,000 ruahman a ni a, socio-economic cen­sus behchhanin chhung­kaw nuai 1,074 thlan chhuah tawh a ni.

Ayushman Bharat ban pakhat zawk dang leh chu India rama Health sub-centre, PHC, Urban PHC 1,50,000 vel chu Health & Wellness Centre-ah siam a ni a; nimina hawn tak ITI Venga Urban Primary Health & Wellness Centre pawh Ayushman Bharat hmalakna hnuaia mi a ni.

Anupriya Patel chuan, Ayushman Bharat prog­ramme hmang hian Mizoramah chuan Health sub-centre 20, PHC (damdawi-in) pali leh Urban PHC pariat, a vaiin health centre 32-te chu Health & Wellness Centre-ah siam a ni dawn tih a sawi a, "Centre-te hi thawktu inpe zo tak takte'n an vil dawn a, healthcare service chi 12 an pe dawn a ni," a ti a; mipuite chu hmang ṭangkai turin a chah.

Khualzahawm, Health minister Lal Thanzara pawhin thu sawiin, mi­pui hriselna kawnga hmalaknaah Mizoram sorkar a phûr thu a sawi a, "Health & wellness kawnga hmalakna thar pawh hi Mizoram mipui­te'n kan mamawh mek leh kan tana ṭangkai tur, nunna tam tak chhan chhuahna a nih ngei ka ring," a ti a; mipui an hrisel leh zual theih nan invenna leh enkawl damna bakah, khawsak phung hrisel zawk leh taksa sawizawina lam ngaih pawimawh a ṭul thu a sawi.

Lal Thanzara chuan, kum eng emaw ti kal ta aṭangin Mizoramah zun­thlum, stroke leh a kaih­hnawih thihna a tam thu sawiin, "Mithiamte chuan cancer-a kan sang lutukte hi sa rêp kan ei nasat vang leh vaihlo kan tih nasat vangah an ngai a; hengte hian nunphung ṭha leh hriselna kawnga zirtirna ṭha min petu tur wellness centre kan mamawhzia a tilang a ni," a ti.

ITI Venga Urban Pri­mary Health Centre-ah hian general ward bikah khum panga a awm a, nau neihna ward bik a awm bawk.