Thanliana'n Plant Health Clinic a hawng

Rashtriya Krishi Vikas Yojana (RKVY) scheme kaltlanga cheng nuai 20 sénga sak, Lunglei Divisional Horticulture Office chunga Plant Health Clinic cum Conference Hall sak chu nimin khan Horticulture minister PC Lalthanliana'n a hawng.

PC Lalthanliana chuan, Plant Health Clinic cum Conference Hall chu kut hnathawktuten ṭangkai taka an hman ngei a beisei thu a sawi a, "Thlai ei chhetu rannung leh natna hrang hrang laka ven leh enkawl kawngah nasa takin hmasawnna a thlen dawn a. Horticulure department hmalakna hrang hrangin kut hnathawktute tan eizawnna rahbi nghet a tuk ṭeuh tawh a, a la tuk chho zel dawn a ni," a ti.

Kut hnathawktute sorkarin a ngai pawi­mawh tih sawiin Horticulture Minister chuan, "Kut hnathawktute tan inbuatsaihna leh rem­ruatna ṭha tak tak a siam ṭhin a, chutih rualin, a chhawr ṭangkaitu tur kut hnathawktute'n hman ṭangkai nachang an hre lo ang tih a hlauhawm hle," a ti a; department hmalaknate hlawhtlinna chu kut hnathawktute ah a innghat thui hle tih a sawi.

Horticulture Minister sawi danin, kut hna­thawktute thlai tharte ṭha taka lak khawm leh hralh chhuahna atan Cold Chain System buatsaih mek a ni a, chuta tan chuan sorkar laipui aṭangin cheng nuai 600 hmuh tawh a ni. Cold Chain System atan hian Sairang, Lunglei, Serchhip, Kolasib, Mamit leh Khawzawlahte Cold Storage Building sak a nih dawn bakah, refer van panga leh pick-up truck panga service tir a ni ang.

Plant Health Clinic Laboratory-ah hian Horticulture department mithiam­ten thlai eichhetu rannung hrang hrangte an zir chiang dawn a, a hun taka thlai enkawl dan tur leh a nih ang tur taka enkawl turin kut hnathawktute an zirtir ṭhin dawn a ni.