Ram hmasawnna atan mawhphurhna Kan nei ṭheuh - Minister Awmpuii Chawngthu

Serciulture department chuan, nimin khan Khawlailung Dinthar YMA Hall-ah 'Farmers Training' an buatsaih a; an hun hmanpuitu, Sericulture minister Vanlalawmpuii Chawngthu chuan, Mizoramin hma a sawn theihna atan mipuite'n mawhphurhna an neih ṭheuh thu a sawi.

Vanlalawmpuii chuan, ṭanpuina dawngtute'n an dawn chhan ang ngeia an hman a, an hlawhtlinpui ṭheuh chuan Mizoram chu a ding chhuak ang a, hmasawnna nasa zawk kan hmuh dawn tih sawiin, "Kan ramin hma a sawn zel theih nan kan zavai hian mahni zawn ṭheuhah mawhphurhna kan nei ṭheuh a ni," a ti.

Sericulture Minister chuan, Khawlailung chu SAGY village (model village) hmasa ber atana thlan a nih bakah sorkar aṭanga duhsakna tam tak a dawng zui tih sawiin, "Duhsakna kan dawn chhan hria a, kan lawmthu sawina tur chu a taka thawh chhuah a ni tih kan hriat a pawimawh," a ti a; Mizoram sorkarin mipui hnenah ṭanpuina kawng hrang hrangin a pek ṭhin thu a sawi.

Training hi North East Region Textile Promotion Scheme (NERTPS) hnuai­a buatsaih a ni a, project coordinator Lalremsiama'n scheme kalphung leh a thil tum te, pangang vulhtute tana thil pawimawhte a sawifiah.

Inkhawmah hian Khaw­lailunga pangang vulhtu ṭha mi pathum thlan chhuah hnenah Central Silk Board-in an tumsak lawmman hlan a ni a; lawm­man dawngtute chu - pakhatna Roliana, pahnihna Lalremtluangi leh pathumna Lianmama te an ni.