KHAWTHLIR

Thisen pe
Mamawii Higher Secondary School NSS unit chuan nimin khan an sikulah blood donation camp an nei a, Aizawl Civil Hospital tan hmeichhia 26 leh mipa 24-te'n thisen unit 50 an pe. Nimin vek khan Lengpui Branch KṬP-in an din champha lawm nan Synod Hospital tan thisen unit 36 an pe a, a petute mipa 31 leh hmeichhia panga an ni.

CM Relief Fund
Chief Minister's Relief Fund atan Mizoram Ministerial Service Association-in Rs. 50,000, Serchhip P&E Veng Branch YMA-in Rs. 3,000 leh Serchhip Penticostal Youth Department-in Rs. 2,000 tun hnai khan an chhûng lut.

Building hawng
Lungdai Primary Health Centre Buiding thar chu Thawhlehni khan Health minister Lal Thanzara'n a hawng a, a chhawrtu Lungdai leh a chhehvel khuate tan hmasawnna mellung pawimawh tak a nih ngei a beisei thu a sawi. Lungdai PHC hi out-patient, in-patient leh office building a awm a, cheng nuai 113 senga sak a ni.

Fresher’s Day
Women’s Polytechnic, Aizawl chuan nimin khan zirlai tharte lawmna hun Fresher’s Day 2018 an hmang a, Higher & Technical minister R Romawia'n a hman pui a, ṭhalaite zingah mahni kut kea din tum an pun nasat thu a sawi. Women’s Polytechnic, Aizawl hi kum 1998 khan din a ni a, department pali a awm.

Khelmual hawng
Champhai Jail Venga khelmual laih thar, JH Roṭhuama Field chu nimin khan bialtu MLA leh field hming putu JH Roṭhuama'n a hawng. Field laihna senso hi bialtu MLA-in a fund aṭanga a tum a ni a, a dung metre 100 leh a vâng metre 58 niin, Rs. 40,25,000 sênga siam a ni.

Faina enfiah
Khawpui fai inelna kalpui mekah nimin khan Thenzawl Town Sanitation and Cleanliness Committee chuan an chairman Pinky Zosangpuii, SDO(C) hoin Thenzawl khaw chhunga veng hrang hrangte an fang a; faina kawnga khawtlang hmalaknate a hmunah an enfiah. Field verification an tih zawhah meeting neiin, hmalak zel dan tur an sawiho nghal a ni.