Sorkarin district 3 tihpuitlin a tum lo ; Ṭawi-ah R Lalzirliana'n din a tum lo?

Chief minister Lal Thanhawla chuan, Saitual leh khaw dang pahnih, district headquarters-a puan tawhte chu sorkarin tihpuitlin a tum loh thu leh, kumina Assembly inthlanpuiah Ṭawi bialah MLA ni lai leh Home minister R Lalzirliana'n din nawn a tum loh thu, Ṭawi Block Congress hruaitute a hrilh.

CM Lal Thanhawla hi tun hnai khan a banglaah Ṭawi East & West Block Congress Committee hruaitute'n an kâwm a; Lal Thanhawla chuan, Ṭawi bialah MLA ni lai R Lalzirliana chu a din duh tawh dawn loh avangin, tu nge ding se an duh tih Ṭawi Blcok Congress hruaitute chu a lo zawt a ni.

Ṭawi East & West Block Congress Committee hruaitute chuan, R Lalzirliana aia Ṭawi biala ding tur duh an neih leh neih lohah ngaihtuahna an la hman ngai loh thu sawiin, Congress party president Lal Thanhawla chu an chhan theih loh thu an hrilh tih an sawi.

Saitual district puan tawh chu tihpuitlin a, Saitualah DC dah a nih loh chuan Congress party tan campaign ngaihna a awm loh thu sawiin Ṭawi Block Congress hruaitute chuan, Ṭawi bialah Congress an tla a nih pawhin ministry mawhphurhna a nih tur thu CM an hrilh tih an sawi a; CM Lal Thanhawla chuan, district tihpuitlin a nih dawn loh thu a sawi a, district tipuitling tur zawnga nawr lo turin a lo ngen tih an sawi bawk.

CM Lal Thanhawla an hmuh­naah hian Ṭawi Block Congress Committee hruaitute an kal kim hle a; Ṭawi West Blcok Congress hruaitute pawhin Saitual district-a beh an hreh loh thu CM an hrilh tih an sawi bawk a ni.