Police-te tana training buatsaih khâr

Mizoram Police officer-te tana Aizawl SP conference hall-a buatsaih ni thum awh, 'Social Defence Issues for Middle Level Police Functioneries' tih thupuia hmanga training buatsaih chu nimin khan khâr a ni.

Training khâr inkhawmah hian Vangalini editor K Sapdanga'n 'Role of media and network' tih thupui a sawi a, "Police leh chanchin thar thehdarh hna hi thil inzûl tak, inpersan tak ni bawk si a ni," a ti a; police officer-te chu hna an thawhna kawngah mi dang a nghawng theih dan ngaihtuah tel ṭhin turin a chah.

K Sapdanga chuan, dan bawhchhe lote chung­ah hleilen a thiang lo tih sawiin, "Hetih rual hian, thil sual titu man chhuah an ngaih tho avangin hma an lak a ngai tho a, hetiang thilah hian fimkhur taka hna an thawh a ngai. Media hna ber chu thil thlen dan kimchang mipui hnena hriattir a ni a, hei hi police lam hna nen a inkalh chang a awm ṭhin avangin fikhur a ṭul," a ti.

Training hi sorkar laipuia Social Justice and Empowerment Ministry hnuaia National Institute of Social Defence puihnaa Mizoram Police Headquarters-a Training Branch-in a buatsaih a ni a, district hrang hranga police officer-te an tel a ni.