MIMER hi phuailuai taka din a ni ; College ṭha a nih kan ring lo - MNF

MNF Vigilance Committee chuan nimin khan Aizawl Press Club-ah thuthar thehdarhtute an kâwm a; Mizoram Institute of Medical Education & Research (MIMER) chu phuailuai taka din niin an sawi a, "Medical college ṭha tak a nih kan ring lo," an ti.

MNF Vigilance Committee-a secretary David R Lalsawmtluanga chuan, State Referral Hospital leh MIMER chungchangah mipuite'n thu dik tak an hriat Congress-in an hlau nia sawiin, "Medical college chhenfâkawm tak kan neih theih nan MNF sorkarin ruahmanna ṭha tak kan siam a, Congress-te'n an chhunzawm duh loh avang leh phuailuai taka an kalpui tâk avangin, a paitu MNF tan ngawihbopui theih a ni lo," a ti a; Mizo mipuite thu dik hrilh chu an tih turah an ngaih thu a sawi.

David R Lalsawmtluanga chuan, medical college atana MNF hmachhawp Congress-in chhunzawm se chuan kum 5 kal taah medical college din a nih tawh tur thu sawiin, "Kum 2014 khan DPR an thehlut thei chauh a, vawi thum DPR hnâwl a nih hnuah a vawi lina atana July 5, 2015-a an thehluh chu MCI-in a pawm hram a ni. Medical college hotu lu ber hmingah buai nghalin, state-a college pakhat hotu principal ti lo a, director an ti hi a fuh lo nghal," a ti.

MIMER society anga kalpui a ni chu an rinhlelh thu sawiin David R Lalsawmtluanga chuan, "Society kalpui dan tur Memorundum of Association (MoA) hi zir chian hman loh khawpa hmanhmawh leh tur luihna hnuaiah, hnawhsarum taka kalpui a nih avangin a him lo kan ti. College chunga thuneitu MCI leh Central guideline-ah 'Medical college hi society-ah dah tur emaw, dah rawh u' tihna kan hmu lo," a ti a; society anga kalpui duhna chhan chu sum siam duh vanga an ngaih thu a sawi.

MNF hruaitute chuan, MIMER Director chu thuneihna sang tak pek a nih thu sawiin, "College pakhat hotu, re-employee, contract-a rawih thlenga thuneihna pek hi him lo kan ti. Health Minister nen hian engtianga thûkin nge sam an inphiar zawm tih kan zawt a ni. MIMER-a thawk tur staff nurse bakah thawktu dangte pawh MPSC kut ata an laksak a, duhsak zawngte lak tumna kawng an hawng hi ṭha lo kan ti. State ṭhenkhata an kalpui dan, ‘hna hralh ṭhin ang’ kha Mizoramah a thlen ve kan hlau hle," an ti.

Congress party-in Referral Hospital leh MIMER atan CSS leh NEDP aṭangin cheng vbc. 252 an hmu tih an sawi thu tarlangin MNF chuan, "Building pakhat pawh an sak belh lo a, MNF sorkar sak sa rei tak an luah luh duh loh vanga hlui hmel tawhte rawng an hnawih thar a, an invawm lut ringawt a ni. Sum tlemte hmanga MNF hnathawh zozai saw Zoram mipuiin an hriat lohna atan thu dik zîktluak lo puangzar kual mai mai," an ti a; Congress chu cheng vbc. 252 an hman ralna chipchiar tak puangzar turin an phût.

MIMER Director thuneihna MNF-in an tarlan ṭhenkhat
. Committee zawng zawngah, thawktute lakna tur thlengin member secretary a ni vek.
. Sum chingpen leh store bungraw bo ziah bo (writeoff) theihna power pek a ni.
. Zirna-ina thawktute chuan academic lam chiah an ngaihtuah tur a nih laiin, MIMER-a thawktu pakhat chu administration leh financial lamah thuneihna sang tak pek a ni.
. Building thar sak tur leh repair tur hrang hrangah thuneihna tàwpkhâwk pek a ni.