Mizote hmusitah MZP-in AG an puh

Mizo Zirlai Pawl (MZP) hruaitute chuan, Mizorama accountant general (AG) Pravindra Yadav chu Mizote leh tribal-te hmuhsitah an puh a; nimin khan a pisa­ah hmuh tum mah se, Mi­zoram AG pisa hi a inkhâr avangin an hmu thei lo.

MZP chuan thuchhuah siamin, Mizoram AG Pra­vindra Yadav chu Mizo­ramah June 2018 aṭangin a thawk ṭan tih sawiin, "Mizorama a thawh aṭanga rei lo te chhungin a hnuaia thawk Mizote leh tribal, a bikin North East mite nen buaina neuh neuh an nei nghal a; hmusit tak takin Mizote a ṭawng khum ṭhin a ni tih hriat a ni," an ti.

MZP tarlan danin, AG Pravindra Yadav hian AG pisaa contract-a thawk Mizo 30 chu chhan mumal awm loin bàn turin hma a la a; Mizote'n a chhan hriat tumin hmuh an tum ṭhin a, mahse, a hmu duh lo a, ''In bàn chhanah hi chuan ka thu thu a ni,' tiin a chhang ṭhin. Hei hi ṭha ti loin MZP hruaitute'n Pravindra Yadaav chu August 29, Nilaini-ah hmuh an tum a, mahse, a lo hmu duh lo a ni.

Pravindra Yadav-a chêt dan chu Mizo hnam hmuhsitna leh tham lohnaa an ngaih thu sawiin MZP chuan, "Mizo ṭhalai contract-a thawk mekte ruai nawn leh turin kan ngen a, MZP thu thlente ngaichâng tura AG Office-a kal leh tura thu dah a ni," an ti. MZP hruaitute chuan nimin khan AG Office-ah Pravindra Yadav hmuh tumin an kal leh a, mahse, AG Office chu khâr a ni a, office staff kal an awm lo.

MZP president L Ramdinliana Renthlei chuan, AG Pravindra Yadav chu Mizote hmu­sittu a nih avangin Mi­zorama awm reng tlaka an ngaih loh thu a sawi a, "Tunah hian Pravindra Yadav hi a tlanbo niin kan hria. Kan ṭhalaipui, an department-a contract thawkte contract hi a tifel lo a nih chuan, Mizoramah lo lêt tawh lo turin kan duh," a ti.