KHAWTHLIR

Thisen pe
Pachhunga University College NSS chuan kum­ina an college Diamond Jubilee pualin nimin khan an college-ah blood donation camp an huaihawt a; zirtirtu leh zirlai mipa 401 leh hmeichhia 151-te'n Aizawl Civil Hospital tan thisen unit 552 an pe. New Serchhip Venglai Branch YMA pawhin nimin khan Serchhip District Hospital tan thisen unit 20 an pe a, a petute mipa 16 leh hmeichhia pali an ni.

Minister-in enfiah
Social Welfare minister PC Lalthanliana chuan, nimin khan Lunglei Salem Venga National Cadet Corps (NCC) South, Mizoram Battalion hmun tur a tlawh a, hna thawh dan a enfiah. Minister hi Lunglei DC Dr Ankita Chakravarty leh official dangte'n an ṭawiawm a ni.

Hall hawng
Vaikhawtlang Community Hall chu August 29, Nilaini khan khan bialtu MLA TT Zothansanga’n a hawng. Hall hi Border Area Development Programme (BADP) sum nuai 27 senga sak a ni.

Tuiah tla hlum
Lalawmpuia (10) s/o PC Lalrinsanga, Mamit Kanan Veng chu nimin tlai dar 4:30 vel khan Khurpui (tuikhur)-ah a tla hlum. Mamit aṭanga thu dawn danin, Lalawmpuia leh a ṭhiante hi Khurpui bulah an inkhel a, a insil tur a chesual nia rin a ni. Hmuh a nih velah Lal­awmpuia hi damdawi-inah hruai ni mah se, an chhan hman lo a ni.

Ramthar Ni
Vawiin, August 31 hi Ramthar Ní a ni a, Mizorama Presbyterian Kohhranten an hmang ang. Mizorama Presbyterian Kohhran dintu Rev.David Evan Jones (Zosaphluia) chu August 31, 1897-ah Mizoramah a rawn thleng a, a rawn thlen ni hi kum 1973 aṭangin Ramthar Ni atan hman a ni ta a ni. Kumina Ramthar Ni thupui chu 'Pathian thu chu a darh a, a pung ta telh telh a' tih a ni.

Inzirtirna hun
Agriculture leh PHE department leh DRDA-te chuan, nimin khan Tlungvel Community Hall-ah model Village, faina leh organic farming chungchang inzirtirna an buatsaih a, Rajya Sabha MP Ronald Sapa Tlau-in a hmanpui. Ronald Sapa chuan, "Hmasawnna hi sum ringawtah a innghat lo a, mihring rilru put­hmangah a innghat thui hle a ni," a ti.