Congress innghirnghona a nasa - Zoramthanga

MNF president Zoramthanga chuan, Congress chhungkuaah innghirnghona a nasa hle a, ṭang rual leh tak tak thei chi an ni tawh lo niin a sawi.

Nimina Sihphir Tlangveng community hall-a Sihphir MNF Group Conference-ah thu sawiin Zoramthanga chuan, "Congress party hi bél keh phuar khawm ang chauh an ni a, tui an pâi thei tawh lo. Engtin tin emaw an inphuar khawm a nih pawhin awmze neiin an inphuar khawm leh thei tawh dawn lo. An chhungkaw buaina hi a naménlo hle a, ṭangrual leh tak tak thei chi an ni tawh lo," a ti.

Zoramthanga chuan, Congress an chhiat tak viau chhan hi MNF-in an beih thiam vang a ni lo tih sawiin, "Pathian pawi an sawi vang a ni. 'Zu zawrhah kohhran ràwn ngai kan ti lo' an ti a, 'Kohhran ṭawngṭai chhanna chu zu zawrh a ni' an ti. Pathian leh Kohhran a an zah lo hle a ni," a ti a; Congress chu an bulpui ber Delhi aṭangin an chhe vek tawh a, Mizoramah pawh kumina inthlanah an tla dawn niin a sawi.

MNF President chuan, Mizoram chu mikhual sorkar lak aṭangin a neitu dik takin a enkawl a hun tawh nia sawiin, "Zu leh drugs vangin a sang têl kan thi a, zu zawrh tihtawp hi a ṭul tawh hle a ni," a ti.

Zoramthanga chuan, ZPM chu MLA pakhat an neihchhun, MPC MLA chu candidate atan dah nawn an tum lo nia sawiin "An tlem tawh nâk alaiin an la lungrual lo hle. An tlem conpensate nan hming ropui tak tak - Chief Ministerial Candidate tih te, Secretary General tihte nihna hming ropui tak tak an invuah a ni," a ti bawk.

MNF party thuchhuah chuan, nimina Sihphir MNF conference-ah hian party dang leh neutral aṭangin voter 192 an lawm lut niin an tarlang.